Inspektoriati Shtetëror Shëndetësor ka kërkuar mbylljen e sinjalit të transmetimit të radio-televizionit Ora News.
Lajmin e ka bërë me dije vetë televizioni që informon se një ditë më parë është gjobitur me 20 milionë lekë.
“Mbyllja e televizionit ka ndodhur sepse janë lejuar njerëzit të flasin në studio. Kjo është e qëllimshme. Është bërë inspektimi vetëm me një foto, nuk kanë ardhur në televizion inspektorë. ” thekson drejtori i informacionit te RTV Ora, Brahim Shima.
Në dokumentet e publikuara shihet se ISHSH kërkon mbylljen e televizionit nën argumentin se në studiot e tij ka pasur më shumë se dy të ftuar, gjë që sipas masave për paramndalimin e përhapjes së koronavirusit është e ndaluar.
Si rast përsëritjeje e kësaj shkeljeje, ISHSH dhe AMA kërkon mbylljen e sinjalit të këtij televizioni dhe ndalimit të funksionimit të pajisjeve, pas marrjes së vendimit nga ministria përgjegjëse për shëndetësinë dhe zbatohet nga organi kompetent, bazuar në nenin përkatës.
