Qeveria britanike e Boris Johnson ka shpallur sot një listë të plotë të vendeve, qytetarët e të cilave që do duan të shkojnë në Britaninë e Madhe, duke filluar nga data 10 korrik do të jenë të përjashtuar nga masa e karantinimit 14 ditorë.
Nëse deri tani ishte rregulli që shtetasit e huaj të karantinoheshin 14 ditë, për një listë shtetesh Britania ka vendosur që duke nisur nga 10 korriku, udhëtarëve nuk do t`i duhet të qëndrojnë për dy javë të izoluar.
Sipas autoriteteve shëndetësore në Mbretërinë e Bashkuar, rreth 60 shtete dhe territoret e huaja që konsiderohet se kanë nivele të ulëta të koronavirusit nuk do të duhet të izolohen. Ndër vendet që nuk janë në listë, veç Shqipërisë janë Shtetet e Bashkuara, Suedia, Meksika, Brazili, Rusia, Irani, India, Pakistani dhe Bangladeshi.
Ndërkohë, në rajon, Serbisë, Greqisë dhe Kroacisë i është hapur drita jeshile.
Britania është ndër vendet e fundit në Europë që mori masa izoluese pas shfaqjes së koronavirusit, ndërsa është kthyer në një nga vendet më strikte sa i përket hyrjeve dhe daljeve nga vendi.
Kryeministri Boris Johnson përsëriste se të gjitha masat janë fleksibile, dhe mund të kthehen mbrapa. Sipas këshilltarit për mjekësi në qeverinë britanike, Chris Whitty, lehtësimi i masave përfaqëson “balancim të arsyeshëm të rrezikut”.
Kryeministrja skoceze, Nicola Sturgeon, ministri i parë i Uellsit, Mark Drakeford dhe Arlene Foster nga Irlanda Veriore, sakaq kanë këmbëngulur se masa e distancimit fizik prej dy metrash do të vazhdojë të mbetet në fuqi në vendet e tyre. Mbretëria e Bashkuar numëron deri tani 283 mijë infektime nga koronavirusi e gati 44.000 vdekje.
Kujtojmë se Shqipëria, para pak ditësh nuk u përfshi nga BE-ja në vendet e ashtuquajtura ‘të sigurta’ nga pikëpamja epidemiologjike, dhe për rrjedhojë nuk iu hapën kufijtë me vendet e Unionit, edhe në listën britanike nuk figuron.