Pas arrestimit të Edmod Haxhisë, që dyshohet se është porositësi i vrasjes së Ardian Nikulajt, është vënë në pranga britanikja Harriet Bridgeman, e përfshirë në vrasje si vëzhguese.
Ajo është arrestuar pas bashkëpunimit të policisë shqiptare me homologët në Britaninë e Madhe. Pritet që ajo të ekstradohet drejt vendit tonë.
Më herët policia njoftoi se u arrestuan edhe dy shtetas të tjerë britanikë krahas porositësit. Vijon të jetë në kërkim ekzekutori dhe një shtetas britanik.
Policia e Shtetit
Në vijim të punës kërkimore për lokalizimin dhe kapjen e personave të shpallur në kërkim për vrasjen e shtetasit Ardian Nikulaj, falë bashkëpunimit të ngushtë mes Policisë shqiptare dhe asaj britanike, pas shkëmbimit të informacionit, lokalizohet, kapet dhe vihet në pranga, me qëllim ekstradimin drejt Shqipërisë, shtetasja britanike H. B.
Ndërkohë, Policia e Shtetit vijon intensivisht punën, në bashkëpunim të ngushtë me partnerët, për lokalizimin dhe kapjen edhe të 2 personave të tjerë të shpallur në kërkim në lidhje me ngjarjen.
Kujtojmë se ngjarja ndodhi më 19. 04. 2023 rreth orës 13:25 në ambientet e lokal “Coral”. Ardian Nikulaj u ekzekutua në lokalin e tij.
Shkak i këtij krimi të rëndë sipas drejtorit të Policisë së Shtetit është gjakmarrja, ndërsa njoftoi se ekzekutori është një shtetas portugez.
