Media prestigjioze CNN, ka cituar sot një deklaratë të frikshme të Dr. Dadin Bonkole, mjekut i cili zbuloi virusin vdekjeprurës të Ebolës.
“Ky nuk është një trillim fantastiko-shkencor; të gjithë duhet të kemi frikë. Ebola ishte e panjohur. Covid-i ishte i panjohur. Tani duhet të druhemi nga sëmundje të tjera”, ka thënë doktor Bonkole.
Edhe pse virusi i Ebolës, sot ka një vaksinë dhe një trajtim dhe është arritur që të ulet shumë vdekshmëria prej saj në Afrikë, ende ka shumë të panjohura, njësoj si në rastin tashmë të covid-19.
Sipas profesorit Jean-Jacques Muyembe Tamfum, i cili ndihmoi të zbulohej ebola në 1976-ën, njerëzimi përballet me një numër të panjohur virusesh të reja dhe potencialisht fatale që mund të dalin prej pyjeve tropikale të Afrikës.
“Ne jetojmë në një botë ku patogjenë të rinj mund të shfaqen në çdo moment. Dhe kjo përbën një kërcënim për njerëzimin”, ka deklaruar Tamfum.
Ebola ishte një prej tyre. CNN ka shkruar se tashmë perëndimit do t’i duhet të mbështetet te shkencëtarët afrikanë në Kongo dhe në të tjera vende afrikane, për të vepruar si roje të cilët lëshojnë alarmin për sëmundje vdekjeprurëse të ardhshme.
Që nga infeksioni i parë që u identifikua në 1901, shkencëtarët kanë gjetur të paktën 200 viruse të tjera që dihet se shkaktojnë sëmundje tek njerëzit.
Sipas hulumtimit nga Mark Woolhouse, profesor i epidemiologjisë së sëmundjeve infektive në Universitetin e Edinburgut, specie të reja të viruseve po zbulohen me një shpejtësi prej tre deri në katër në vit. Shumica e tyre e kanë origjinën nga kafshët.
Ekspertët thonë se rritja e numrit të viruseve në zhvillim është kryesisht rezultat i shkatërrimit ekologjik dhe tregtisë së kafshëve të egra.
Ndërsa habitatet e tyre natyrore zhduken, kafshë si minjtë, lakuriqët e natës dhe insektet mund të transportojnë viruse tek njerëzit.
Ata janë në gjendje të jetojnë së bashku me qeniet njerëzore dhe shpesh dyshohet se janë vektorët që mund të sjellin sëmundje të reja tek njerëzit. /Gazetareforma.com/
