Opozita dhe Aleanca për Mbrojtjen e Teatrit ashtu siç edhe paralajmëruan paraditen e sotme, kanë dalë në shesh për të protestuar një ditë pas prishjes së Teatrit Kombëtar.
Dyert e kryeministrisë janë rrethuar me gardh metalik për t’i paraprirë çfarëdolloj situate. E ndërsa forcat e FNSH, “Shqiponjat” dhe RENEA-t janë në gatishmëri.
Nuk dihet ende skenari i opozitës, por siç shihet policia është përgatitur edhe për rastin se mund të ndodhin përplasjetë forta mes tyre e qytetarëve.
Nga ana tjetër, paralel me orarin e protestës, presidenti Ilir Meta po mban një takim me ambasadorë të BE në vendin tonë.
Takimi mes kreut të shtetit dhe 4 diplomatëve të huaj po mbahet në Pallatin e Brigadave dhe në fokus të takimit është situata që po përjeton vendi ynë.
Sipas informacioneve paraprake, bëhet me dije se në takim është thirrur edhe ambasadorja e SHBA-së, Yuri Kim, por ajo nuk i është përgjigjur ftesës së Metës, për motive ende të paqarta.
