Denoncime të reja për projektin “Durrës Marina” po hedhin dritë mbi probleme serioze që ngrejnë pikëpyetje të forta për sigurinë dhe transparencën e këtij investimi gjigant. Pas raportimeve për zhytjen deri në 74 centimetra të dy prej godinave të para, tashmë dalin pretendime se në strukturë janë shfaqur krisje që po mbulohen me ndërhyrje të shpejta për t’u maskuar.
Në emisionin “Piranjat” u publikuan dëshmi nga një nënkontraktor i punimeve të betonit, i cili deklaroi se dy pallatet kanë pësuar ulje të konsiderueshme në tokë. Në vijim të këtij rasti të transmetuar, është raportuar edhe një tjetër denoncim që ngre akuza më të rënda: sipas tij, problematikat nuk kufizohen vetëm tek zhytja, por përfshijnë edhe krisje në strukturë që po mbulohen me beton të lëngshëm, në vend që të adresohen.
Po sipas këtyre pretendimeve, gjatë punimeve është gërmuar deri në 180 metra pa u gjetur një shtresë e qëndrueshme, ndërsa kompani të huaja inxhinierike, përfshirë studio zviceriane dhe britanike, dyshohet se janë tërhequr pa ofruar zgjidhje konkrete.
Nëse këto të dhëna rezultojnë të sakta, bëhet fjalë për një rrezik serioz për sigurinë afatgjatë të gjithë projektit.
Por për Gazetën Reforma, kjo situatë nuk është e re. Prej kohësh kemi ngritur zërin dhe kemi raportuar për problematikat që e kanë shoqëruar këtë projekt që nga fillimi, duke u bërë thirrje të vazhdueshme qytetarëve që të tregohen të kujdesshëm dhe të mos blejnë apartamente në këtë zhvillim.
Që në fazat e para, janë evidentuar praktika të diskutueshme, si shitja e apartamenteve pa leje ndërtimi për shumicën e objekteve dhe kërkimi i parapagimeve për prona që ekzistonin vetëm në plane dhe broshura. Në të njëjtën kohë, çmimet janë rritur në mënyrë të fortë, duke kaluar mbi 3,000 euro për metër katror.
Të dhënat e publikuara më herët tregojnë se nga 9 godinat për të cilat kishin përfunduar shitjet, vetëm 3 dispononin leje ndërtimi. Ndërkohë, kompania kishte arkëtuar 22 milionë euro nga parapagimet e klientëve gjatë vitit 2023, ndërsa investimet reale në terren rezultonin dukshëm më të ulëta. Ky model financimi, i mbështetur kryesisht tek paratë e blerësve dhe jo tek kapitali i garantuar, është raportuar si një risk i lartë për përfundimin e projektit.
Sot, me raportime për zhytje dhe krisje në strukturë, këto shqetësime bëhen edhe më konkrete.
Projekti, i prezantuar si një marinë elitare, rezulton në pjesën më të madhe një zhvillim rezidencial, ndërsa toka publike është vënë në dispozicion me vendim politik. Kjo shton edhe më shumë përgjegjësinë për atë që po ndodh në terren.
Gazeta Reforma ka paralajmëruar vazhdimisht për këto rreziqe dhe u ka bërë thirrje qytetarëve që të mos përfshihen në një projekt me kaq shumë paqartësi. Zhvillimet e fundit tregojnë se këto paralajmërime nuk kanë qenë të pabaza.
Tashmë mbetet që institucionet përgjegjëse të ndërhyjnë me verifikime të plota dhe transparente, për të garantuar sigurinë e strukturave dhe për të mbrojtur interesin e qytetarëve që kanë investuar në këtë projekt.
