Një ngjarje e rëndë ka ndodhur në klubin e natës “Lollipop” në Palasë, ku një përplasje mes dy grupeve të rinjsh ka shkaktuar panik të madh mes të pranishmëve. Incidenti ndodhi gjatë një nate festive, kur në skenë ishin Ylli Limani dhe grupi “Three Dots”.
Dy grupet e të rinjve janë përplasur fizikisht duke përdorur mjete të forta si gota, shishe dhe madje edhe armë zjarri. Konflikti ka shkaktuar kaos total në ambientet e klubit, ndërsa shumë prej të pranishmëve janë përpjekur të ikin me nxitim për të shmangur plumbat.
Ende nuk është e qartë nëse nga kjo përplasje ka të plagosur me armë zjarri apo viktima. Dëshmitarët raportojnë se gjatë tentativës për të dalë, shumë persona janë rrëzuar dhe janë lënduar si pasojë e përplasjes me njëri-tjetrin.
Shkaku i konfliktit mes dy grupeve nuk dihet ende. Deri në momentin e publikimit të këtij lajmi, Policia e Vlorës nuk ka dhënë asnjë deklaratë zyrtare lidhur me ngjarjen.
