Organizata Botërore e Shëndetësisë (OBSH), ka deklaruar se imuniteti i tufës kundër koronavirusit, nuk ka shumë gjasa që të zhvillohet këtë vit, përkundër fushatave të vaksinimit që kanë nisur në disa vende.
”Edhe kur vaksinat të fillojnë t’i mbrojnë më të cenueshmit, ne nuk do të arrijmë nivele të imunitetit të popullsisë ose imunitetit të tufave në vitin 2021. Edhe nëse kjo ndodh në disa vende, njerëzit në të gjithë botën nuk do të jenë të mbrojtur”, ka thënë shkencëtarja e OBSH-së, Soumya Sëaminathan.
Ndërkohë nga Evropa në Amerikë dhe Azi, virusi ka dalë të jetë i ashpër, pavarësisht masave të izolimit që synojnë frenimin e përhapjes së tij.
Për të arritur imunitetin e tufës, është i nevojshëm vaksinimi i 70 apo 80 për qind të popullsisë.
Në Evropë dhe në Shtetet e Bashkuara të Amerikës (SHBA), fushatat e imunizimit janë duke ecur me ritëm të ngadalshëm, për shkak të furnizimeve të kufizuara me vaksina dhe sfidave logjistike.
Bashkimi Evropian nga ana tjetër, i cili ka një popullsi prej afro 450 milionë banorësh, ka blerë gati 2.3 miliardë doza nga gjashtë prodhues vaksinash.
Megjithatë, deri më tani vetëm dy vaksina, Moderna dhe Pfizer/BioNTech, janë të miratuara.
Kujtojmë se koronavirusi që prej fillimit të pandemisë dhe deri tani, ka prekur mbi 90 milionë njerëz në të gjithë botën.
Nga 90 milionë të prekur, mbi 1.9 milion kanë humbur jetën, ndërsa mbi 50 milionë janë shëruar.
Shtetet e Bashkuara të Amerikës (SHBA), janë vendi më i prekur në botë, me mbi 22.6 milionë të infektuar dhe mbi 376,000 viktima.
Ndërkohë në Evropë Mbretëria e Bashkuar është vendim me më shumë infektime, me mbi tre milionë të infektuar dhe mbi 82,000 viktima./Gazetareforma.com/
