Prokuroria e Tiranës ka vendosur që të mos nisë asnjë procedim penal për anëtarët e Komisionit Institucional të Zgjedhjeve (KIZ), pas kallëzimit që bëri rektori Mynyr Koni, duke i akuzuar se kishin vazhduar punën për procesin zgjedhor në Universitetin e Tiranës, në kundërshtim me aktin normativ përgjatë pandemisë së koronavirusit.
Sipas Prokurorisë, kallëzimi i Konit nuk përmban elemente të veprës penale, prandaj nuk do të nisë procedimi penal ndaj Majlinda Ketës dhe anëtarëve të tjetë të KIZ, Bernard Dosti, Oriona Muçollari, Ardian Doka, Eglantina Gishtisi.
Në kallëzimin e rektorit Koni ata akuzoheshin për “shpërdorim të detyrës” dhe “kryerje funksioni pas dhënies fund të tij”.
Kujtojmë që para se t’i kallëzonte penalisht, Koni i ka shkarkuar të sipërpërmendurit edhe nga detyra.
“Ka shkelur në mënyrë flagrante rregullorjen për organizimin e zgjedhjeve për autoritetet dhe Senatin Akadamik të UT, duke përgatitur, firmosur dhe dërguar me email edhe në formë shkresore dokumenta, të cilat janë në shkelje të rregullores së sipërcituar”, thuhej në vendimin e UT për shkarkimin e pedagoges Majlinda Keta.
