Paraditen e sotme është si edhe është lajmëruar, Sekretari i Përgjithshëm i Partisë Demokratike ka qenë i thirrur në Prokurinë e Tiranës për akuzën e ngritur ndaj Sandër Lleshajt.
Akuza ka pasur në thelb përdorimin e gazit lotsjellës në protestat e opozitës dhe PD-ja ka ngritur akuzë ndaj Ministrit të Brendshëm dhe Policisë së Shtetit.
Pasi ka dhënë deklaratën e tij, jashtë Prokurorisë, Gazmend Bardhi ka folur për mediat duke thënë se prokuroria duhet të fillojë hetimet dhe mos të bëhet shtojë e Policisë së Shtetit, pasi është një organ që ka përgjegjësitë e veta.
“Isha për të dhënë sqarime për padinë e PD-së ndaj Ministrit të Brendshëm dhe funksionarëve të tjerë të policisë. Kam dhënë faktet dhe provat e disponuara nga PD për veprimet e kundra-ligjshme për drejtuesit dhe punonjësit e policisë së shtetit kanë sulmuar qytetarët, duke i ndaluar në ushtrimin e të drejtës së protestës. Prokuroria në bazë të videove në media mund ta niste vetë hetimin, gjë që nuk ka ndodhur. I bëj thirrje Prokurorisë, të mos bëhet shtojnë e Policisë së Shtetit. Nuk është një organ në varësinë e Ministrit të Brendshëm, Prokuroria duhet të ushtrojë përgjegjësitë e veta. Ka 40 qytetarë që janë në burg pa asnjë provë. Nuk ka asnjë pamje filmike se kanë kryer veprime të dhunshme”, ka thënë Bardhi.
Gjithashtu Sekretari i Përgjithshëm i PD-së ka thënë se ngjarja e Rinasit për Ministrin e Brendshëm është incident, ndërsa protesta ngjarje kriminale, por gjithsesi ai i drejtohet prokurorëve dhe gjyqtarëve.
“ E keni dëgjuar se Ministri i Brendshëm protestën e quan ngjarje kriminale, ndërsa vjedhjen në aeroport si incident. Apeli im është për gjyqtarët dhe prokurorët, nuk kanë për ta kaluar vettingun nëse i shërbejnë qeverisë, fundi i prokurorëve dhe gjyqtarëve që i shërbejnë në mënyrë të verbër qeverisë kriminale, do të jetë i njëjtë me qeverinë kriminale”, deklaroi Gazment Bardhi.
Nuk kanë munguar edhe etiketimet ndaj Lleshajt, të cilin e quan “mbetje komunizmi”.
“Ministri i Brendshëm është mbetje e komunizmit, që e quan protestën si “puç kushtetues”. Nuk do të ketë asnjë ministër, asnjë drejtues policie, prokuror apo gjyqtar që t’i mohojnë të drejtën e protestës qytetarëve. Vetëm për një mbetje komunizmi si Sandër Lleshaj protesta është ‘puç kushtetues’ ”
