Banorët e fshatit Hotolisht kanë protestuar sot kundër projektit për zgjerimin e rrugës kombëtare Librazhd–Prrenjas, pjesë e Korridorit VIII, duke e cilësuar atë si një kërcënim të drejtpërdrejtë për jetesën, pronat dhe të ardhmen e komunitetit.
Në tubim morën pjesë edhe fëmijë e nxënës gjimnazi, ndërsa tensionet me forcat e policisë nuk munguan.
Simbolika e protestës ishte e fortë: një arkivol u vendos në qendër të turmës, ndërsa pankartat mbanin mesazhe të qarta si:
“Jemi gati të përgjigjemi! Ose ne, ose ju!”. Banorët e quajtën arkivolin “shtëpia e fundit”, një paralajmërim për pasojat që do të sjellë projekti nëse nuk ndalet ose rishikohet.
“Institucionet heshtin. Asnjë reflektim, asnjë dialog. Kjo heshtje po na shtyn drejt një rruge pa kthim. Ne nuk duam përplasje, por nuk do të lejojmë që të shkatërrohet jeta jonë në emër të një projekti që na injoron”, tha një prej përfaqësuesve të banorëve.
Protestuesit e bënë të qartë se nuk janë kundër ndërtimit të rrugës, por kërkojnë që procesi të zhvillohet me transparencë, respekt për pronat private dhe kompensim të drejtë.
Sipas tyre, mungesa e përfshirjes në vendimmarrje dhe rreziku për të humbur shtëpitë pa asnjë garanci janë të papranueshme.
“Ne kërkojmë zgjidhje pa kosto sociale. Duam të mbrojmë vendin tonë dhe do ta bëjmë këtë me çdo mjet ligjor. Nesër mund të jetë shumë vonë”, u shprehën banorët, duke paralajmëruar përshkallëzim të protestave nëse nuk dëgjohen.
