Kreu i Partisë Demokratike, Lulzim Basha mësohet se ka mbledhur grupin parlamentar të PD-së. Mësohet se mbledhja ka zgjatur pak minuta dhe ka përfunduar para nisjes së seancës plenare në Kuvend, ku pritet që ditën e sotme të caktohen sekretariatet, komisionet, si dhe byroja. Sa i përket komisioneve, nga 8 në total, tre do të drejtohen nga PD, ndërsa në pesë të tjerat, Partia Demokratike do të ketë postin e nënkryetarit.
Burime bënë me dije se opozita do të krijojë tre grupe parlamentare. Bëhet me dije se në Kuvend do të jenë grupi parlamentar i PD, ai i PDIU dhe ai i aleatëve të tjerë të Bashës, përkatësisht PR, PAA, LZHK dhe PBDNJ.
Këto të fundit, do të krijojnë grupet parlamentare me ndihmë të Partisë Demokratike, pasi një grup parlamentar duhet të ketë të paktën 7 deputetë. Për këtë arsye, PD do t’i japë PDIU, e cila mori në zgjedhjet e 25 prillit 3 deputetë, edhe 4 deputetë të tjerë, për të krijuar grupin e saj parlamentar.
Gjithashtu, PD do iu japë 3 deputetë partive të tjera aleate PR, LZHK, PAA dhe PBDNJ, të cilat morën në zgjedhje 4 deputetë. Ky grup parlamentar do të drejtohet nga Fatmir Mediu, që do të jetë kryetar, ndërsa Agron Duka do të jetë nënkryetar, Merita Bakiu zëdhënëse, Elda Hoti sekretare, si dhe tre anëtarë Emilja Koliqi, Dashamir Shehi e Vangjel Dule.
Ndërsa grupi parlamentar i PDIU do të drejtohet nga Mesilda Doda, me nënkryetare Ilda Dhori, zëdhënëse Andia Ulliri, sekretar Nusret Avdulla, si dhe anëtarët Shpëtim Idrizi, Selaurin Jakupllari dhe Kasem Magmutaj. Ndërsa nuk ka asnjë informacion për Lëvizjen Socialiste për Integrim, nuk dihet ende nëse kjo forcë politike ka kërkuar deputetë nga PD dhe nëse do ketë grup parlamentar apo jo.Më herët, gjatë orëve të paradites së sotme, kryedemokrati Lulzim Basha ka zhvilluar një mbledhje me 7 deputetët Tomor Alizoti, Belind Këlliçi, Ervin Salianji, JoridaTabaku, Gazment Bardhi, Agron Gjekmarkaj dhe Alfred Rushaj. Burime bëjnë me dije se tema e diskutimit ka qenë për “çështejen Berisha”. Kujtojmë se ish-kryeministri Sali Berisha, u përjashtua nga Basha disa ditë më parë. Nuk ka informacione më të detajuara në lidhje me temën e diskutimeve.
