Në Belgjikë po vazhdon gjyqi i procesit të koduar “Shqiponja e Zezë”, ku 34 persona akuzohen si pjesë e një organizate kriminale që merrej me trafik ndërkombëtar të kokainës.
Një nga të pandehurit, Arten Hamzai, djali i Alfredo Hamzait i konsideruar si drejtuesi i rrjetit, ka dalë para Gjykatës së Apelit të Brukselit dhe ka deklaruar se nuk kishte dijeni për aktivitetet e të atit.
Ai theksoi se besonte që babai i tij merrej me pasuri të paluajtshme dhe se kishte trashëguar para.
“Babai im ishte në biznesin e pronave të paluajtshme. E dija se kishte një precedent penal, por më thanë se kjo kishte ndodhur para se të lindja unë. Nuk isha në dijeni që ai ishte ende subjekt i disa urdhërarresteve evropiane dhe ndërkombëtare në vitet 2020-2021.”
27-vjeçari, i lindur në Tiranë, jeton prej vitesh në Antwerp me prindërit e tij. Në kohën e ngjarjes, ai punonte në një dyqan veshjesh dhe studionte për kontabilitet në një universitet në Antwerp.
Sa i përket sendëve luksoze që zotëronte, si orët Rolex dhe Richard Mille, të cilat kapin vlera deri në 400,000 euro, ai tha se kishte një pasion për orët mekanike që në fëmijëri.
Ndërsa për aksionet që mbante në disa kompani në pronësi të të atit, si Summer Depo në Vlorë – një kompleks i pasurive të paluajtshme dhe mikpritjes, si dhe biznese si Bakkery Factory, Pear 2019 dhe 2A Construction, ai pretendoi se nuk kishte dijeni për këtë fakt.
