Organizata Botërore e Shëndetësisë (OBSH) ka dhënë miratimin emergjent për vaksinën Covid të bërë nga firma kineze Sinopharm. Kjo është vaksina e parë e zhvilluar në një vend jo-perëndimor që merr mbështetjen e OBSH-së. Deri më tani, OBSH kishte aprovuar vetëm vaksinat e bëra nga Pfizer, AstraZeneca, Johnson & Johnson dhe Moderna.
Sidoqoftë, rregullatorët individualë të shëndetit në vende të ndryshme – veçanërisht ato më të varfra në Afrikë, Amerikën Latine dhe Azi – kanë miratuar tashmë vaksinat kineze për përdorim emergjent.
Me pak të dhëna të lëshuara ndërkombëtarisht herët, efektiviteti i vaksinave të ndryshme kineze ka qenë prej kohësh i pasigurt. Drita jeshile nga OBSH është një udhëzues për rregullatorët kombëtar se një vaksinë është e sigurt dhe efektive.
Ekspertët e pavarur në Grupin Strategjik Këshillimor të Ekspertëve të OBSH-së (SAGE) rishikuan vaksinën CoronaVac nga provat klinike të fazës 3 në Kinë, Brazil, Indonezi, Turqi dhe Kili. Vaksina Sinovac është autorizuar në 32 vende dhe juridiksione, me 260 milion doza të shpërndara, thanë ekspertët e SAGE ditën e djeshme. Do të thotë gjithashtu që vaksina mund të përdoret në programin global Covax, i cili synon të sigurojë rreth dy miliardë vaksina në vendet në zhvillim.
Ndërkohë, vendi ynë është një nga 32 vendet në botë që kanë marrë doza të vaksinës kineze të Sinovac. Coronavac është vaksina që është përdorur më shumë në Shqipëri, me 500 mijë doza që kanë ardhur në vendin tonë. Pavarësisht zërave kundër apo skeptikë për sigurinë e kësaj vaksine, Organizata Botërore e Shëndetësisë e ka vërtetuar se vaksina është efektive. Kjo është një siguri e shtuar për të gjithë ata që kanë bërë vaksinën në vendin tonë dhe mund të kenë pasur dyshime në sigurinë e saj.
