Një ngjarje e rëndë ka ndodhur mesditën e sotme në shkollën “Gjergj Kastrioti” në Mat, ku një nxënës 16-vjeçar është plagosur me thikë nga një bashkëmoshatar i tij.
Konflikti mes dy të rinjve ka ndodhur në ambientin sportiv të shkollës gjatë orës së fiskulturës dhe dyshohet se ka nisur për motive banale.
Autori i dyshuar, 18-vjeçari Donald Lepuri, është arrestuar nga policia menjëherë pas ngjarjes.
I plagosuri, Alban Gjonaj, u dërgua fillimisht në spitalin e Burrelit, ku iu nënshtrua një operacioni, dhe më pas u transferua drejt Spitalit të Traumës në Tiranë për ndihmë të specializuar.
Fatmirësisht, ai ndodhet jashtë rrezikut për jetën.
Policia ka sekuestruar armën e ftohtë të përdorur gjatë konfliktit dhe ka nisur hetimet për zbardhjen e plotë të rrethanave të ngjarjes.
Një nga shqetësimet e ngritura nga ngjarja është mungesa e masave të sigurisë në shkollë. Sipas burimeve, në shkollën “Gjergj Kastrioti” në Baz të Burrelit nuk ka oficer sigurie dhe psikologë për të asistuar nxënësit.
Ndërkohë, numri i nxënësve që frekuentojnë këtë shkollë është 96, nga të cilët 35 janë nxënës të shkollës së mesme dhe pjesa tjetër janë nxënës të shkollës 9-vjeçare.
Sipas autoriteteve, dy të rinjtë nuk kanë pasur konflikte të mëparshme.
