Procesi i numërimit të votave të diasporës është në vazhdim, me rreth 94,896 zarfa të numëruar deri më tani nga një total prej 194,889, që përbën afërsisht 48.7% të votave të dërguara.
Të dhënat paraprake tregojnë një avantazh të theksuar për Partinë Socialiste, e ndjekur nga Partia Demokratike dhe Nisma Shqipëria Bëhet, që renditen respektivisht në vendin e dytë dhe të tretë.
Rezultatet e deritanishme të votës së emigrantëve:
1. Partia Socialiste e Shqipërisë – 50,814 vota (54.02%)
2. Koalicioni PD – Aleanca për Shqipërinë Madhështore – 26,768 vota (28.46%)
3. Nisma Shqipëria Bëhet – 7,935 vota (8.44%)
4. Partia Mundësia – 3,335 vota (3.55%)
5. Lëvizja Bashkë – 2,467 vota (2.62%)
6. Partia Socialdemokrate – 1,101 vota (1.17%)
7. Koalicioni Euroatlantik – 664 vota (0.71%)
8. Aleanca Kombëtare Shqiptare – 533 vota (0.57%)
9. Djathtas për Zhvillim – 255 vota (0.27%)
10. Lëvizja Atdheu – 146 vota (0.16%)
11. Aleanca Demokracia e Re – 48 vota (0.05%)
Megjithatë, pavarësisht avantazhit të qartë të PS-së, rezultati përfundimtar i diasporës mbetet me peshë në disa qarqe ku gara është ende e hapur.
Sipas analizës, tre qarqe mund të përjetojnë ndryshime në ndarjen e mandateve:
• Tiranë: PD-ASHM dhe Partia Mundësia janë në betejë të fortë për një mandat. Mundësia aktualisht e ruan mandatin e dytë me një diferencë të vogël, por çdo votë nga diaspora mund të përmbysë rezultatin në favor të PD-së, duke i çuar ata në mandatin e 14-të.
• Fier: PS mbron me vështirësi mandatin e 9-të, me një avantazh prej rreth 500 votash. “Nisma Shqipëria Bëhet”, e cila performon mirë në votën e emigrantëve, po e ngushton diferencën ndjeshëm.
• Lezhë: Diferenca mes PD-ASHM dhe PS është rreth 1,250 vota në favor të opozitës, por me rreth 5,000 vota të pambaruar nga diaspora, gjithçka mbetet e hapur.
