Banorët e Nivicës kanë bërë kallëzimin e radhës në SPAK për 464 ha tokë në “Gjirin e Kakomesë”, por dosja ka shkuar fillimisht për kompetencë në Prokurorinë e Vlorës, për të verifikuar nëse Luan Leka, Shaban Memia dhe bashkëpunëtorët e tyre kanë konsumuar apo jo veprën penale të shpërdorimit të detyrës dhe falsifikimit të dokumenteve.
Rreth 1 mijë banorë të Lukovës pretendojnë se kanë trashëguar brez pas brezi 464 ha tokë bujqësore. Banorët u pajisën me aktin e marrjes së tokës në pronësi për sipërfaqen e ndarës sipas ligjit 7501, por nuk u pajisën për 30 hektarë tokë që ndodhet në Gjirin e Kakomesë. Si pasojë, banorët e çuan çështjen në Gjykatë.
Në vitin 2013, Gjykata e Apelit të Gjirokastrës mori vendim i cili urdhëronte pajisjen e pronarëve me aktin e marrjes në dorëzim të pronës. Ky vendim ka marrë formë të prerë, por kurrë nuk është zbatuar plotësisht nga organet publike për çështjen e pronave.
Banorët nuk marrin në dorëzim tokën, pasi ata pretendojnë se prona e tyre është rrethuar nga biznesmeni Luan Leka. Ky i fundit pretendon se banorët e Nivicës jetojnë në një zonë malore dhe nuk kanë asnjë lidhje me të.
Sipas Lekës, fshati i banorëve është 7km larg “Gjirit të Kakomesë”. Ai pretendon gjithashtu se shteti ia ka dhënë atij tokën për ndërtimin e fshatit turistik.
Në 20 dhjetor të vitit 2004, Ministria e Turizmit i ka kaluar me marrëveshjes Gjirin e Kakomesë shoqërisë ‘Riviera Kakome’ të Luan Lekës, për ndërtimin e një fshati turistik. Më 23 mars të vitit 2012, Shaban Memia, në emër të shtetit, i shet kompanisë së Luan Lekës, 29 hektarë tokë në Gjirin e Kakomesë, për ndërtimin e fshatit turistik. Në bashkëpunim me Shaban Meminë, Luan Leka mori në dorë Gjirin e Kakomesë. Megjithatë, sot në Gjirin e Kakomesë nuk ka fshat turistik, por vetëm një rrethim.
Në kallëzimin e fundit, banorët pretendojnë se të gjitha aktet e kalimit të Gjirit të Kakomesë në duart e Luan Lekës janë false dhe se kemi të bëjmë me përvetësim të pronës private, pasi prona është e tyre, tashmë me vendim gjykate. Kreu i SPAK, Arben Kraja, i cili në vendimin për të dërguar dosjen për kompetencë në Vlorë, thotë se mund të kemi të bëjmë me veprën penale të falsifikimit të dokumenteve dhe shpërdorimit të detyrës nga Shaban Memia.
Në gusht të vitit 2020, kompania e Luan Lekës ka arritur të marrë një vendim sigurim padie, duke ruajtur pronësinë mbi Gjirin e Kakomesë, të cilin ia shiti Shaban Memia. Ditët e fundit, drejtori i Kadastrës në Sarandë, Andri Dhima, ka informuar familjet e Nivicës se prona që ata pretendojnë, është regjistruar në emër të Luan Lekës në 3 qershor 2021.
