Përsëri Kancelarja Merkel i flet kryeministrit tonë vetëm nga larg. Prej një viti, Edi Rama gjendet i izoluar dhe nuk ka kryer asnjë vizitë zyrtare në vendet perëndimore. Të vetmit që e presin në takime janë Erdogani i Turqisë dhe Alievi Azerbajxhanit. Në përpjekje për të prishur vetminë Rama ia ka dalë të bëjë këtë lidhje me skype me gruan e hekurt të Gjermanisë, e cila nuk e priti në Berlin.
“Me Kancelaren Merkel, biseduam pak më parë për rreth 60 minuta mbi Planin e Madh të Investimeve të Bashkimit Europian për Ballkanin Perëndimor dhe nxitjen e mëtejshme drejt Shengenit Rajonal; progresin e Shqipërisë pas vendimit për çeljen e negociatave dhe përpjekjet në vijim drejt Konferencës së Parë Ndërqeveritare me BE, si edhe kryesimin e suksesshëm të OSBE nga Shqipëria dhe sfidat deri në përmbylljen e mandatit tonë në dhjetor.
Edhe njëherë si gjithnjë, kënaqësi e veçantë biseda me Kancelaren gjermane, një mike e shkëlqyer që e njeh, e kupton dhe e ndjek rajonin tonë e Shqipërinë gjithashtu, me detaje e vëmendje krejt të posaçme!” shkruan Rama në Facebook. Ndërkaq, nga Berlini nuk ka akoma njoftim zyrtar mbi përmbajtjen e bisedës.
