Ditën e djeshme u dha alarmi për bombë në makinë e gjyqtarit Markelian Kuqo.
Autorësia është marrë përsipër nga Naim Behari, një i burgosur në burgun e Drenovës.
Ky i fundit nëpërmjet “Faxëeb” ka bërë me dije se veprimi i djeshëm nuk ishte kërcënim, por paralajmërim.
Behari shprehet, se gjyqtari në fjalë ka shkelur të drejtat e njeriut.
Sipas tij, Kuqo ka vendosur ta transferojë të dënuarin në një burg tjetër, që ai nuk e do.
Behari e ka marrë këtë veprim si një tallje nga ana e gjyqtarit.
Më tej ai ka kërcënuar Kuqon, se nëse nuk kthen mbrapsh transferimin, nuk do t’i gjendet as varri.
Ai pretendon se është ish-efektiv i CIA-s dhe pjesë e Cosa Nostras.
“Flas nga burgu i Drenovës, pranoj publikisht që ky gjyqtar ka një proces gjyqësor që ka një muaj dhe ka shkelur të drejtat e njeriut. Për shkak se unë kam bindje të djathta ai tallet me mua. Unë kam bërë një kërkesë në gjykatën e Korçës dhe kërkoj që të transferohem nga ky burg, ndërsa Kuqo do të më çojë në një burg që unë nuk e dua. Ky zotëria më përmend mua se pse kam shtetësinë greke, pse atij do ti jap llogari unë. Unë jam personi i porosita atentatin dje. Nuk ishte kërcënim por paralajmërim. Prej dy muajsh gjyqtari tallet me mua për transferimin. Unë jam urdhërues i atij muhabeti, nëse ai nuk revokon masën ndaj meje, nëse nuk mban përgjegjësi unë do të them që këtij gjyqtari nuk do i gjendet as varri. Ta dëgjojë edhe Arta Marku këtë. Unë jam ish-ushtarak, ish-efektiv i CIA-s. Unë jam edhe anëtar i Cosa-Nostra-s italiane. Ardi Veliu e di shumë mirë këtë. Gjyqtari shkeli të drejtat e mia, dhe ky gjyqtari nuk e kalon Vettingun”, është shprehur Naim Behari.
Naim Behari është një person me rrezikshmëri të lartë shoqërore.
Në 2005-ën ai vrau një taksist në Marinëz të Fierit, të cilin donte ta grabiste.
Për këtë krim ai u dënua me 24 vite heqje lirie.
Ai gjithashu ka kërcënuar nëpërmjet një telefonate nga burgu i Fushë-Krujës, se do të kryejë akte terroriste.
