Shqipëria në vitet e fundit ka njohur një zhvillim ekonomik nga sektori i turizmit, i cili me gjithë problemet e mëdha që ka vendi, vitin e kaluar, pra në 2019, arriti kulmin e të ardhurave nga ky sektor.
Por në botë sot ka shumë shtete që sektorin e turizmit e kanë një ndër shtyllat e ekonomisë, apo edhe vende që e varin të gjithë ekonominë e tyre vetëm tek turizmi.
Vitin e kaluar, një në dhjetë persona punonte në sektorin e udhëtimeve dhe turizmit, duke kontribuar me 8,9 trilionë dollarë, ose rreth 10.3% në ekonominë globale.
Në pesë vjet, deri në vitin 2019, sektori i turizmit ishte përgjegjës për një në katër të të gjithë vendeve të reja neto të punës, të krijuara në nivel botëror.
Kjo para se të godiste COVID-19. Ndërkohë që shumë destinacione të njohura po presin sërish turistë duke treguar kujdes, vijon hemorragjia në vendet e punës dhe të ardhurat në këtë sektor.
Organizata Botërore e Turizmit e Kombeve të Bashkuara (UNWTO), vlerësoi në maj, se numri i turistëve ndërkombëtarë mund të bjerë me 60 – 80% në vitin 2020.
Nga kjo mund të humbin rreth 197.5 milionë vende pune në këtë sektor, sipas “World Travel & Tourism Council” (WTTC) që i raportonte këto të dhëna në qershor.
Kjo shifër mbështetet në “skenarin më të keq” ku pengesat, si kufizimet në udhëtime dhe karantina, qëndrojnë ende në fuqi.
Sektori i udhëtimeve dhe turizmit është një punëdhënës i madh në mbarë botën, por për disa vende, është ndonjëherë edhe i vetmi burim pune dhe të ardhurash.
Ishujt e Karaibeve mbështeten fort në industrinë e udhëtimeve dhe turizmit për punësimin, ku kjo industri përfaqëson 90.7% të vendeve të punës në “Antigua and Barbuda” në vitin 2019.
Kjo sipas raportit të fundit të WTTC mbi ndikimin ekonomik dhe në punësim tek industria e udhëtimeve dhe turizmit, në 185 vende dhe 25 rajone gjeografike dhe ekonomike.
Në vend të dytë është, Aruba, ku vitin e kaluar, vendet e punës në sektorin e turizmit përfaqësonin 84,3% të punësimit total.
St.Lucia, është në vend të tretë, me 78,1,%, ndjekur nga US Virgin Islands me 68.8% dhe British Virgin Islands me 66.4%.
Në listë është edhe qyteti aziatik i Macao-s me 65,5% të të ardhurave nga turizmi dhe parajsa e Oqeanit Indian, Maldivet me 59,6%.
Nëse ekonomia e turizmit nuk riaktivizohet sërish në botë si përpara pandemisë, për këto shtete ishuj ose arkipelage, do të jetë një falimentim i vërtetë edhe pse konsiderohen si “Parajsat tokësore”.
/Burimi: World Economic Forum/ Përshtati: GazetaReforma.com/
