Situata nga COVID paraqitet e rëndë në vendin tonë. Tre spitalet COVID (Infektivi, Shefqet Ndroqi dhe COVID3) janë thuajse plot dhe drejt ezaurimit të të gjithë shtretërve. Një gjë të tillë e ka konfirmuar edhe gazetari i News 24, Erion Skëndaj.
Ai ka thënë se ka vende të lira vetëm në momentin kur shërohen pacientë të shtruar, apo kur dikush humbet jetën. Ndërkohë, gjatë ditës së sotme në spitalin Infektiv ka pasur një numër më të vogël urgjencash, por rastet që vijnë janë mjaft të rënduara. Ndër të tjera gazetari ka thënë se nga katër persona një rezulton pozitiv me koronaviurs, ndërsa një numër i madh rastesh janë duke u trajtuar aktualisht në banesa, apo në spitalet rajonale për të cilat Skëndaj thotë se gjithashtu janë plot.
Gjendja nga COVID në vendin tonë vazhdon të paraqitet alarmante, teksa vetem ditën e djeshme janë regjistruar 1071 raste të reja dhe kanë humbur jetën 19 persona. Si pasojë e mbingarkesës në spitalet COVID në Tiranë, javën e kaluar u hapën edhe spitalet COVID nëpër rrethe, duke filluar me Durrësin e me Shkodrën. Ndërkohë, procesi i vaksinimit po ecën me ritme shumë të ngadalta dhe deri me tani Shqipëria nuk ka marrë as 10 mijë doza vaksine.
