Një ditë pas arrestimit, drejtori i Spitalit të Fierit, Arben Voja, sëmuret në paraburgim dhe shtrohet në spitalin që drejtonte

Arben Voja, drejtori i Spitalit Rajonal të Fierit, i arrestuar një ditë më parë nën dyshimet për shpërdorim detyre, është transportuar me urgjencë në spital pas problemeve shëndetësore të shfaqura gjatë qëndrimit në paraburgim.

Voja është dërguar mbrëmjen e 12 nëntorit në Spitalin Rajonal të Fierit, pikërisht në institucionin që drejtonte deri në momentin e arrestimit.

Sipas burimeve spitalore të cituara në raportim, ai ndodhet në katin e dytë të godinës, ku po i nënshtrohet ekzaminimeve për të vlerësuar gjendjen shëndetësore.

Arrestimi i Vojës lidhet me një hetim për tjetërsimin e rreth 44 mijë metrave katrorë tokë shtetërore në zonën e Povelçës, gjatë periudhës kur ai drejtonte Kadastrën e Fierit. Sipas dyshimeve të prokurorisë, prona ka kaluar në pronësi private përmes dokumenteve të falsifikuara, me qëllim ndërtimin e një parku fotovoltaik.

Ende nuk ka informacion të detajuar mbi komplikacionet shëndetësore të Vojës apo kohëzgjatjen e qëndrimit të tij në spital.