Procesi i votimit për qytetarët shqiptarë që jetojnë jashtë vendit ka nisur zyrtarisht në kuadër të zgjedhjeve parlamentare të 11 majit. Kryekomisioneri Ilirjan Celibashi bëri të ditur se deri më tani janë shpërndarë rreth 36% e zarfeve postare, që përkthehen në 90 mijë fletë votimi.
Gjatë një deklarate për mediat, Celibashi konfirmoi se 111 votues të diasporës kanë përfunduar procesin e votimit dhe zarfi i parë pritet të mbërrijë në Shqipëri pasditen e sotme. Shtetet me shpërndarjen më të madhe të zarfeve janë Italia, Greqia dhe Gjermania.
“Votuesi i parë, që jeton në Gjermani dhe është nga qarku Dibër, e ka marrë zarfin në orën 07:15 të mëngjesit. Brenda dy ditëve do të synojmë përfundimin e shpërndarjes së të gjitha zarfeve,” tha Celibashi.
Aktualisht, 11 zarfe janë në rrugë drejt Qendrës së Numërimit, por ende ndodhen në sistemin logjistik të kompanisë DHL. Celibashi sqaroi se procesi i votimit konsiderohet i nisur sapo votuesi merr zarfin dhe e dërgon atë mbrapsht me postë.
Ai theksoi gjithashtu rëndësinë e ruajtjes së fshehtësisë së votës dhe paralajmëroi për pasojat penale në rastet e shitblerjes apo publikimit të votës.
“Në momentin që zarfi hyn në sistemin e KQZ-së dhe të DHL, fshehtësia e votës është 100% e garantuar. Por nëse individët zgjedhin ta tregojnë apo ta shesin votën e tyre, duhet të jenë të ndërgjegjshëm për pasojat ligjore, të cilat mund të çojnë deri në 5 vite burg,” deklaroi Celibashi.
Ai bëri të ditur se administrimi i zarfeve me votat e diasporës nuk do të zhvillohet në ambientet e KQZ-së, por në një hapësirë të posaçme në Parkun Olimpik në Tiranë. Aty do të bëhet dokumentimi dhe numërimi i votave, nën mbikëqyrjen e kamerave të sigurisë dhe të përfaqësuesve të forcave politike.
“Fletët e votimit do të vijnë direkt në Parkun Olimpik, ku janë ngritur të gjitha strukturat për administrimin dhe numërimin. Aty do të vendosen edhe kutitë e votimit,” përfundoi ai.
