Komisioni Hetimor për Sterilizimin dhe Check-Up-in në Shëndetësi ka rinisur përsëri, ku kryetarja e komisionit, Albana Vokshi, akuzoi deputetët socialistë se po përpiqen të pengojnë dëshminë e ish-ministrit të Shëndetësisë, Ilir Beqaj.
Sipas Vokshit, lëvizjet e socialistëve janë të mirëplanifikuara për të devijuar hetimin dhe për të fshehur shkeljet financiare në sektorin e shëndetësisë.
Ajo kritikoi faktin që Beqaj u shoqërua në sallë me pranga, duke e cilësuar këtë si një “show” të organizuar për të shmangur transparencën e komisionit.
Vokshi theksoi se socialistët po përpiqen të pengojnë thirrjen e dëshmitarëve të tjerë, si Vilma Nushi dhe kryeministrin Edi Rama, për të mbuluar abuzimet e pretenduara me fondet publike.
Ajo kërkoi që Beqaj të lejohej të japë deklaratën e tij paraprake dhe prezantimin që ka përgatitur, në mënyrë që komisioni të vazhdojë me pyetjet e saj dhe të hedhë dritë mbi këto akuza.
