Policia e Durrësit arrestoi Luis Xhumarin, operator turistik, me akuzën e “Shkeljes së rregullave të sigurisë në punë” pas një incidenti tragjik në det ku humbi jetën një 34-vjeçar britanik, i cili drejtonte një Jet Ski.
Ngjarja ndodhi në thellësi të detit, ndërsa shkaku i saktë i vdekjes mbetet ende i paqartë.
Ekspertiza mjeko-ligjore do të përcaktojë nëse viktima ka vdekur nga mbytja apo si pasojë e ndonjë problemi tjetër shëndetësor.
Hetimet e policisë tregojnë se viktima nuk kishte leje për drejtimin e mjetit lundrues.
Ndërsa operatori turistik, që ia kishte dhënë në qira Jet Skin, është gjetur duke shkelur rregulloren që kërkon që motorët e ujit të jepen vetëm me drejtues të licencuar. Në rast se pushuesi nuk posedon lejen, drejtimi i mjeteve duhet t’u lihet punonjësve të operatorit.
Ngjarja e rëndë rikthen në fokus nevojën për rritjen e masave të sigurisë në plazhe gjatë sezonit turistik.
