Nga Ura e Bunës, Ministri i Brendshëm Taulant Balla informoi mediat se dyshohet se trupat e një nëne dhe dy fëmijëve të saj të tjerë mund të jenë ende në këtë zonë. I prekur, Balla theksoi rëndësinë e denoncimit të dhunës.
“Ngjarja është shumë e rëndë, fjalët janë të vështira për t’u lidhur,” tha Balla. Ai shtoi: “Policia dhe polumbarët do të vazhdojnë kërkimet pa ndërprerje për të gjetur nënën dhe fëmijët. Iu bëj thirrje të gjitha grave dhe vajzave në këtë vend që të denoncojnë çdo formë dhune.”
Ministri theksoi gjithashtu nevojën për një reagim të gjithanshëm nga shoqëria: “Duhet të ofrojmë mbështetje dhe të krijojmë një mjedis ku gratë mund të ndjehen të sigurta për të raportuar dhunën gjinore dhe seksuale. Është detyrë e të gjithëve në shoqëri të luajnë një rol aktiv në luftën kundër dhunës.”
