Presidentja e Kosovës, Vjosa Osmani, ka dorëzuar në Gjykatën Kushtetuese një kërkesë për shqyrtimin e konfliktit të kompetencave kushtetuese, i shkaktuar nga moskonstituimi i Kuvendit të Kosovës.
Ajo njoftoi këtë gjatë një konference për media, duke theksuar se kishte pritur që kërkesa të arrinte zyrtarisht në Gjykatë përpara se të komunikonte me publikun.
Osmani sqaroi se kërkesa ka për qëllim adresimin e situatës të paprecedentë në jetën institucionale të vendit, ku përkundër vendimit të Kushtetueses që urdhëroi konstituimin e Kuvendit brenda 30 ditësh, nuk ka as konsensus e as kompromis për ta realizuar këtë brenda afatit ligjor.
Në këtë kërkesë, Presidentja kërkon nga Gjykata të sqarojë pasojat juridike të moskonstituimit të Kuvendit brenda afatit të përcaktuar më 26 korrik, si dhe mënyrën se si duhet të ushtrohen kompetencat e institucioneve kushtetuese në mungesë të kësaj shtylle të rëndësishme të pushtetit.
Përveç kësaj, Osmani ka kërkuar masë të përkohshme për pezullimin e afatit 30-ditor, me qëllim shmangien e një bllokade institucionale të pafundme, si dhe parandalimin e një konstituimi të mundshëm jo kushtetues dhe të paqëndrueshëm.
Gjykata Kushtetuese kishte dhënë afat deri më 26 korrik për konstituimin e Kuvendit. Megjithatë, më 21 korrik, deputetët dështuan për herë të 50-të të zgjedhin kryeparlamentarin, për shkak të mosmarrëveshjeve rreth mënyrës së votimit. Partitë opozitare kundërshtojnë ndryshimin e votimit nga i hapur në të mbyllur, duke çuar në bllokadë.
Lëvizja Vetëvendosje, fituese e zgjedhjeve të shkurtit, ka 48 vende në Kuvend dhe është në negociata për koalicion me Nismën Socialdemokrate të Fatmir Limajt, për të arritur shumicën e nevojshme prej 61 votash.
Kryeministri në detyrë Albin Kurti shprehu optimizëm se brenda kësaj jave do të ketë një rezultat nga këto bisedime.
Në Kuvendin prej 120 deputetësh, për të zgjedhur kryetarin nevojiten 61 vota. Ndërkaq, opozita kryesore, përfshirë Partinë Demokratike të Kosovës dhe Aleancën për Ardhmërinë e Kosovës, vazhdon të kundërshtojë kandidatët e propozuar nga LVV-ja.
Po ashtu, disa deputetë të pakicave joserbe kanë sinjalizuar mbështetjen për konstituimin e Kuvendit dhe formimin e qeverisë së re, nëse plotësohen disa kushte. Në skenarin më optimist, me votat e LVV-së, Nismës dhe shtatë deputetëve të pakicave, mungojnë ende tre vota për shumicën e nevojshme.
Situata mbetet e paqartë dhe në pritje të vendimit të Gjykatës Kushtetuese, e cila do të përcaktojë se si do të veprohet përtej afatit ligjor për konstituimin e Kuvendit.
