Katër muaj pas zgjedhjeve parlamentare të 9 shkurtit, Kuvendi i Kosovës vijon të mbetet i pakonstituuar, duke e lënë vendin pa institucione të reja.
Të dielën, për herë të 32-të radhazi që nga 15 prilli, deputetët u mblodhën në një seancë që zgjati fare pak, pa asnjë zgjidhje për zhbllokimin e krizës politike.
Seanca e radhës është caktuar për të martën, më 17 qershor.
Interesi për pjesëmarrje në seancë ka qenë në rënie të dukshme, vetëm 75 nga 120 deputetë ishin të pranishëm. Ngërçi lidhet me mungesën e marrëveshjes për zgjedhjen e kryetarit dhe nënkryetarëve të Kuvendit, një hap thelbësor për nisjen e procesit të formimit të qeverisë.
Vetëvendosje, fituese e zgjedhjeve, këmbëngul në kandidaturën e Albulena Haxhiut për kryetare Kuvendi, por ajo nuk ka arritur të sigurojë shumicën prej 61 votash në votim të hapur.
Partitë e tjera PDK, LDK, AAK dhe Lista Serbe refuzojnë të propozojnë përfaqësuesit e tyre për formimin e komisionit që do të mundësonte një votim të fshehtë.
Propozimi i LDK-së për një qeveri uniteti, i shpalosur përmes një platforme 15-pikëshe nga kryetari Lumir Abdixhiku, është refuzuar nga Vetëvendosje si “i pakuptimtë” dhe “logjikisht i parealizueshëm”, ndërsa PDK dhe AAK janë shprehur në favor të një koalicioni ndërmjet partive që ishin në opozitë në mandatin e kaluar.
Ndërkohë, çështja e mënyrës së votimit për kryetarin e Kuvendit është dërguar në Gjykatën Kushtetuese për interpretim, ku disa parti kanë kërkuar edhe pezullimin e seancave derisa të ketë një vendim zyrtar.
Presidentja Vjosa Osmani ka ngritur shqetësimin publik për vonesat, duke theksuar se kriza dëmton kredibilitetin institucional dhe rrugëtimin euroatlantik të Kosovës.
Edhe përfaqësuesit ndërkombëtarë të QUINT-it dhe BE-së kanë kërkuar me ngulm konstituimin sa më të shpejtë të institucioneve për garantimin e stabilitetit dhe mirëqenies së qytetarëve.
Në pritje të një vendimi të Gjykatës Kushtetuese dhe të vullnetit politik për kompromis, Kosova mbetet e bllokuar mes procedurave dhe përplasjesh ndërpartiake.
