Zbardhen detaje të reja nga dosja e Prokurorisë së Posaçme që përfshin zëvendëskryeministren dhe ministren e Infrastrukturës, Belinda Balluku. Dokumentet e SPAK zbulojnë komunikime private mes saj dhe ish-drejtorit të Autoritetit Rrugor Shqiptar, Evis Berberi, të dërguara pak ditë para se ai të emërohej në krye të institucionit.
Në një prej këtyre mesazheve, dërguar më 28 maj 2021, në orën 15:03, Balluku i shkruante Berberit:
“I dashur Visi, marrëdhënia jonë ka kaluar ups and downs shumë herë, por e rëndësishme është që unë ty të konsideroj një nga personat më të afërt. Ndryshe nga herët e tjera, këtë herë po të jap diçka nga e cila varet e ardhmja ime, e jotja dhe e shumë të tjerëve që ndodhen përqark nesh. Në rast se do të dështojë në këtë detyrë të re, të siguroj që do ishte një goditje e madhe për mua dhe dështimi ka të bëjë me punët, deadlines dhe deri te marrëdhëniet me njerëzit dhe fjalët që do qarkullojnë. Dua ta marrësh shumë seriozisht, dua të reflektosh mbi të dhe e hëna të jetë një stage i ri i jetës tënde profesionale. Hermetizëm, asnjë takim, asnjë premtim, të jesh prezent në çdo kantier, të mos marrësh vendime pa konsultim. Mos më zhgënje! Ta gëzosh, sapo e more emërimin.”
Në të njëjtin moment, Berberi i është përgjigjur:
“Faleminderit. Më ke vlerësuar gjithmonë më shumë sesa kam pasur mundësi ta kthej. Nuk do të zhgënjej, përkundrazi.”
Vetëm tre ditë pas këtij komunikimi, më 31 maj 2021, Evis Berberi është emëruar zyrtarisht Drejtor i Përgjithshëm i Autoritetit Rrugor Shqiptar.
Ky shkëmbim mesazhesh, i përfshirë në dosjen e SPAK, pritet të përdoret si provë për të hetuar marrëdhëniet dhe ndikimin e mundshëm të zëvendëskryeministres Balluku në vendimmarrjet e institucionit.
