Tanja Kodra nga Shkodra ka rrëfyer në emisionin “Fiks Fare” një histori të rëndë dhune dhe pasigurie që, sipas saj, vazhdon edhe pas ndarjes nga bashkëshorti.
Ajo thotë se jeton nën kërcënim të vazhdueshëm dhe ndihet e pambrojtur nga institucionet, pavarësisht se ka denoncuar disa herë.
“Kam frikë për jetën time dhe të fëmijëve. Ai më ndjek, më kërcënon çdo ditë,” shprehet ajo, duke treguar se ka qenë viktimë e dhunës fizike dhe psikologjike për vite me radhë.
Një nga episodet më të rënda ndodhi kur, si pasojë e goditjeve që mori, humbi një shtatzëni në javën e 8-të.
“Kam pasur hemorragji për një muaj dhe humba fëmijën,” thotë Tanja me zë të dridhur.
Ish-bashkëshorti është dënuar më parë me detyrim paraqitjeje për dy vjet, pasi dhunoi djalin e tyre të vogël, por sipas Tanjas, dhuna dhe përndjekja vazhdojnë.
“Më ndjek me makinë, më kontrollon me kë dal, më dërgon mesazhe fyese dhe kërcënuese,” rrëfen ajo.
Gjykata e Shkallës së Parë i ka dhënë Tanjas kujdestarinë e fëmijëve, por ka vendosur që babai të ketë të drejtë takimi me ta çdo ditë për një orë. Ajo e ka apeluar këtë vendim, duke theksuar se ish-partneri nuk është i aftë të kujdeset për ta dhe përbën rrezik.
Në kërkim të mbështetjes institucionale, Tanja është drejtuar edhe tek Qendra e Shëndetit Mendor në Shkodër.
Aty, një mjeke psikiatre e ka përshkruar ish-bashkëshortin si “psikopat dhe dhunues i tmerrshëm”, por në raportin zyrtar është deklaruar se ai është “i shëndetshëm mendërisht” – një kontradiktë që, sipas Tanjas, hedh dyshime serioze mbi trajtimin e çështjes nga institucionet përkatëse.
“Kam humbur çdo besim te drejtësia. Kërkoj vetëm mbrojtje për veten dhe për fëmijët e mi, para se të jetë shumë vonë,” përfundon ajo.
