Ministri i Jashtëm i Greqisë Nikos Dendias, ka reaguar menjëhëerë pas deklaratës së homologut të tij turk, për ftesën që i bëri ky i fundit Athinës për negociata në Tiranë, ku si ndërmjetës do të ishte kryeministri i Shqipërisë, Edi Rama.
Dendias në një reagim zyrtar ka deklaruar se nuk ka marrë ende asnjë ftesë zyrtare për takim, me ndërmjetësimin e Tiranës zyrtare, por shpreh gatishmërinë për të biseduar me Turqinë.
“Deri më tani Ministria e Jashtme e Greqisë nuk ka marrë asnjë ftesë nga Ministria e Jashtme e Turqisë në lidhje me caktimin e datës për mbajtjen e raundit të 61-të kontakteve eksploruese.
Greqia, siç dihet, ka shprehur gatishmërinë e saj për t’iu përgjigjur, në rast të një ftese të palës turke, në bazë të Ligjit Ndërkombëtar në lidhje me caktimin e kufijve të EEZ dhe shelfit kontinental”, ka deklaruar zyra e ministrit Dendias.
Ndërkohë më herët, gjatë një konference në Qipro, ministri turk Çavusoglu u shpreh se “Miq tanët janë angazhuar në negociata. Por ne jemi gati që sot.
Pas këtij takimi të parë, unë do të shkoj në Tiranë, me ftesë të Edi Ramës dhe jam gati të takohem me ministrin e jashtëm grek Dendias. Shpresoj që Greqia do të mos e refuzojë këtë dhe bisedimet të rifillojnë brenda këtij muaji”, deklaroi Çavusoglu./ Gazetareforma.com/
