Ditën e sotme Policia e Shtetit ka arrestuar të shumëkërkuarin Ilir Selmani, që akuzohet se ekzekutoi me breshëri plumbash ish-policin Santiago Malko në rrugën “Xhanfize Keko” në Tiranë më datë 27 gusht të vitit që lamë pas.
Arrestimi i tij është bërë në zonën e Xhamllikut nga njësia e Forcave Shqiponja, bashkë me Forcat e Ndërhyrjes së Shpejtë, në një banesë ku jetonte atje bashkë me persona të tjerë.
Gjatë arrestimit ai shfaqet i veshur me të kuqe.
Selmani dyshohet se është pjesë e klanit Duka, i cili sipas Prokurorisë përgatiti dhe ekzekutoi planin për eliminimin e Malkos.
Sipas të dhënave në dosjen hetimore, Selmani, ka kthyer makinën në momentin që e ka udhëzuar Leonard Duka, pasi ky i fundit kishte arritur ta identifikonin dhe lokalizonin objektivin e tyre, Santjago Malkon.
Ata janë ndaluar pikërisht në rrugën ‘Xhanfize Keko’ ku u qëllua pak minuta më vonë edhe Santiago Malko.
Një tjetër e provë e dyshimtë janë edhe pamjet e publikuara nga disa media, ku Ilir Selmani shfaqet duke mbledhur bishtat e cigareve që kishte hedhur në tokë Blendi Teta, njeriu që mendohet se survejoi lëvizjet e ish-policit Santiago Malko.
Është i vetmi që ka një profil aktiv në rrjetet sociale, ku ka reklamuar gjithë aktivitetin e tij ndër vite: që nga armët, tek pijet e shtrenjta dhe makinat e luksit.
Vrasja e Santiago Malkos
Kujtojmë se Santiago Malko u ekzekutua mbrëmjen e 27 gushtit 2019 në zonën e “Xhamllikut” në Tiranë, në makinën e tij tip “BMW X”.
Ish- polici ishte pjesë e bandës së Ervis Martinajt, rivalë të përbetuar të klanit Duka.
Malko ka qenë i përfshirë në disa ngjarje kriminale, siç është ngjarja e bujshem e ish-Bllokut e 4 tetorit 2018, ku u vra Fabian Gaxhës, apo edhe sherri me dy vëllezërit Lashi në vitin 2016 për një borxh prej 1 mijë eurosh.
Për vrasjen e Malkos deri më tani janë shpallur në kërkim 8 persona, të njohur ndryshe si pjesë e klanit “Duka”: Leonard Duka; Erlis Duka, Ilir Selmani, Oltian Loga, Fatmir Hyseni, Dritan Agaj, Aleksandër Maxhaku dhe Xhoni Nica.
Personi i 9-të i përfshirë në këtë vrasje është Blendi Teta, tashmë i arrestuar dhe në burg.
Në videon e mëposhtme mund të shihni momentin e arrestimit të Selmanit të siguruar nga Balkanweb.
