Një 33-vjeçar nga Kosova i identifikuar me inicialet A.D është vënë në prangat e Policisë Kufitare të Morinës këtë të shtunë pasi rezultonte i shpallur në kërkim ndërkombëtar nga Zvicra. Raporotet se ndaj të riut ishte caktuar masa e sigurimit “Arrest me burg” nga drejtësia zviceriane nën akuzën e pstrimit të parave. Pritet ekstradimi i tij drejt Zvicrës.
NJOFTIMI I POLICISË:
Policia Kufitare e Morinës ndaloi 1 shtetas kosovar të shpallur në kërkim ndërkombëtar, nga Zvicra, për pastrim parash. Shërbimet e Policisë Kufitare, krahas zbatimit të marrëveshjes për qarkullimin e lirë ndërmjet Shqipërisë dhe Kosovës, kanë rritur vigjilencën për goditjen e paligjshmërive në kufi, si dhe për ndalimin e shtetasve që sinjalizohen si të shpallur në kërkim dhe tentojnë të hyjnë apo të dalin nga kjo pikë kufitare.
Në këtë kuadër, në bashkëpunim me shërbimet e DVP Kukës dhe si rezultat i intervistimit të detajuar dhe shkëmbimit të informacionit ndërmjet Interpol Tiranës dhe homologëve në Zvicër, u kap në hyrje të Shqipërisë dhe u arrestua nga Sektori për Hetimin e Krimeve i DVP Kukës, me qëllim ekstradimin në Zvicër, shtetasi kosovar A. D., 33 vjeç.
Ai ishte shpallur në kërkim ndërkombëtar, pasi autoritetet zviceriane i kanë caktuar masën e sigurisë “Arrest në burg”, për pastrim parash. Vijojnë procedurat për ekstradimin e 33-vjeçarit, në Zvicër.
