Trembëdhjetë persona, të cilët bashkëpunonin me njëri-tjetrin janë arrestuar më 25 janar 2019, falë operacionit të koduar “Herostratus”.
Prej dy vitesh kjo organizatë, e përbërë nga shqiptarë dhe italianë, ishte aktive në Viterbo, Itali, ku kishte sulmuar dhe kërcënuar shumë persona.
Shqiptari Ismail Rebeshi dhe italianin Giuseppe Trovato qendronin në krye të bandës.
Banda , po ashtu, kishte lidhje të ngushta me qarqet e Ndrangheta-s.
Së fundmi, Sokol Dervishi, një nga të arrestuarit, që njihej si krahu i djathtë i Rebeshit, ka pranuar të bashkëpunojë me drejtësinë italiane.
Mediat italiane kanë zbardhur një pjesë të dëshmisë së tij përpara oficerëve të policisë:
“Xhuzepe Trovato ishte truri i krejt grupit. Ai dëshironte të kishte nën kontroll gjithqë territorin e Viterbos. Ai donte që banorët e Viterbos të kontrolloheshin prej tij dhe të besuarve të tij. Ai donte të impononte respekt dhe nderime në komunitet. Është e vërtetë, unë kam qenë personi i besuar, të cilit i drejtohej Trovato për të gjitha sulmet që duhet të bënte ndaj rivalëve apo konkurrentëve të tij. Midis dy liderëve, kishte një marrëveshje. Marrëveshje që parashikonte ndihmë të ndërsjellë”– ka thënë Dervishi.
Ai ka treguar edhe një kërcënim ndaj një pronari restoranti, të cilit i kishin kërkuar të dorëzonte 5,700 euro.
“Ne ju djegim vendin dhe ju vrasim familjen ”.- ka qenë kërcënimi me të cilin është përballur viktima.
Tashmë, Dervishi si bashkëpunëtor i drejtësisë do të përfitojë uljen e një të tretës së dënimit ndërsa gjyqi për të do të mbahet më 10 shkurt.
