Ligji i shumëpërfolur për investimet strategjike edhe pse po zbatohet akoma edhe më shumë vitet e fundit, është miratuar që në vitin 2015, si një ligj i përkohshëm për të ofruar mbrojtje të barabartë si për investitorët vendas, ashtu edhe për ata të huaj.
Sipas ligjit të miratuar statusi i investitorit strategjik jepet në gjashtë sektorë; por më shumë se gjysma e investitorëve strategjikë e kanë përfituar këtë status në sektorin e turizmit, duke marrë prona shtetërore që të ndërtojnë komplekse dhe restorte luksoze në buzë të detit.
Sikur të mos mjaftonte vetëm ligji që këta investitorë të kishin të drejtë të ndërtonin vend e pa vend resorte. Në fakt këtyre investitorëve u është ofruar gjithçka gati, pronat e bregdetit, licencat e nevojshme, marrja e lejes me mik, sipërfaqet pyjore, ndërtimi i infrastrukturës ndihmëse, të gjitha këto që në fakt rëndojnë në xhepin dhe taksat e qytetarëve. Gjitha këto të përmbushura me dëshira na qeveria në pushtet, në kurriz të qytetarëve shqiptarëve.
Në lidhje me këtë ligj ka pasur kritika se po shfrytëzohet nga njerëz pranë politikanëve në qeveri apo opozitë për të përvetësuar prona shtetërore dhe private në zonat më të lakmuara bregdetare.
Por problemet kryesore i ka hapur një nen i këtij ligji që thotë se, shteti mund t’ua marrë tokën banorëve të bregdetit për t’i vënë në shërbim të investitorit strategjik.
Është neni 28 i cili parashikon se “për të mundësuar zhvillimin dhe realizimin e projekteve investuese strategjike, lejohet shpronësimi i pasurive të paluajtshme pronë private, nëse investitori nuk ka mundur ta zgjidhë pronësinë mbi pasurinë e paluajtshme me marrëveshje me pronarin…”
Pra nëse një banor nuk bie dakord t’ia shesë tokën e tij investitorit privat strategjik – shteti ndërhyn dhe e shpronëson banorin në interes të investitorit.
Kjo ka bërë që shumë banorë të bregdetit që nuk duan ti shesin tokat e tyre – të dridhen nga ideja që një investitor ua ve syrin atyre për projekte strategjike.
Në këto kushte kur ka përplasje banorët kanë filluar marrin avokatë grekë për tu përplasur me shtetin e tyre sepse kanë humbur besimin se mund të gjejnë të drejtën përbalë një investitori që ua kërkon pronën nën paralajmërimin: Ose ma shit mua, ose shteti do të të shpronësojë.
Këtë nen që ka ngjallur masivisht frikë në zonat bregdetare ende të paprekura nga zhvillimi – shfrytëzoi edhe Beleri për të fituar Himarën.
Shumë banorë pranojnë nën zë se janë të detyruar të deklarohen me prejardhje greke për të patur mbështetje përballë rrezikut që shteti i shpronëson në interes të investitorëve strategjikë./Dita
