Del emri i Erjon Veliajt në gjyqin e Sazan Gurit me kompaninë “Agikons” të Gentian Sulës. Në dhomën penale të Gjykatës së Tiranës u zhvillua këtë të mërkurë seanca e radhës ndaj ambientalistit Sazan Guri.
Sazan Guri i qëndron deklaratës se kodra ku janë ndërtuar vilat luksoze është tektonike dhe e rrëshqitshme. Kjo deklaratë ”cenoi” kompaninë “Agikons” e cila kërkon që profesori të përgënjeshtrojë pohimin.
“Ajo kodër është tektonike nga ana perëndimore, nga ana e Sharrës. E gjithë kjo kodër i mbihipën nga ana e lindjes dhe perëndimit dhe ka një prishje tektonike të thellë dhe të lëvizshme”, deklaron Guri.
Pas seancës, profesor Sazan Guri deklaroi se ka bërë studime shkencore për zonat tektonike të Tiranës, përfshirë dhe Kodrën e Diellit.
“Këta duan të arrijnë dy qëllime, një qëllim që të më godasin si simbol i rezistencës, duan të godasin të gjithë shkencëtarët e Shqipërisë, të gjithë avokatët, që kush guxon dhe del kundër kryetarit të bashkisë Erion Veliaj apo qeverisë, duan të na mbyllin gojën dhe të ndërtojnë një turrë me dru dhe të djegin “Xhordano Brunot” e sotshëm. Çfarë janë këta Agikons dhe kryetari i bashkisë, pronarët e kodrës? Gjeologjia nuk flet vetëm për një pikë apo një pallat”, deklaroi Guri.
Avokati Altin Goxhaj u shpreh me bindje në fitoren e kësaj çështje. Ky gjyq nuk është për Sazan Gurin, por për shtëpinë e kryetarit të Bashkisë së Tiranës Erion Veliaj, deklaroi Goxhaj.
“A ka ndonjë shtëpi Erion Veliaj këtu, sa lekë e ka blerë, kush ja ka dhënë, sa kushton? Ky është gjyq për shtëpinë e Erion Veliaj. Përdor oligarkët e Shqipërisë për të sulmuar qytetarët”, tha Goxhaj.
/GazetaReforma.com/
