Në këtë vend, skandalet ndryshojnë emër, por personazhet mbeten të njëjtë. Sot quhet përmbytje, dje quhej mbetje toksike. Por skema është po ajo: para publike, dështim i qëllimshëm, heshtje institucionale dhe një prokurore që për ironi, në të dyja rastet del në fund për ta mbyllur historinë pa fajtorë realë: Suela Beluli.
Durrësi sot është nën ujë. Qindra familje kanë humbur shtëpitë, prona dhe sigurinë, një njeri ka humbur jetën. Dhe sërish me paturpësinë më të madhe, Rama justifikon dështimin me “fatkeqësi natyrore”. Se shiu ishte i madh. Se Zoti e deshi kështu. Kjo është gënjeshtra më e vjetër e këtij pushteti. Sepse përmbytjet nuk i shkaktoi shiu, por korrupsioni.
Hidrovori i Porto Romanos, një vepër për të cilën janë shpenzuar rreth 19 milionë euro para publike, dështoi pikërisht në momentin kur duhej të funksiononte. Një investim që nuk u bë për qytetarët, por për interesa private. Hidrovori i vjetër u shkatërrua sepse i pengonte biznesin Shefqet Kastratit.
Mbi atë infrastrukturë u ndërtua Porto Romano, u ndryshua rrjedha natyrore e ujërave dhe u mbyllën kanale kulluese që duhej të ishin të hapura. Uji që sot zbret nga kodra dhe përmbyt qytetin, nuk duhej kurrë të vinte aty.
Autoritetet devijuan kanalet, i futën në nëntokë, i orientuan drejt një hidrovori që nuk ka kapacitet teknik për të përballuar prurjet. Një shkatërrim i qëllimshëm i infrastrukturës kulluese. Rezultati është katastrofë për qytetin dhe fitim për disa biznese.
Dhe këtu shfaqet sërish i njëjti emër. E njëjta prokurore. Suela Beluli. E njëjta që kishte në dorë dosjen e mbetjeve toksike në Porto Romano. Mbetje që nuk erdhën nga Zoti, por nga kontrabanda, nga interesa dhe nga mosveprim i qëllimshëm. Ato mbetje u morën në dorëzim nga prokuroria dhe u zhdukën nga sytë e publikut. Pa transparencë. Pa përgjegjësi. Pa asnjë fajtor.
Sot e njëjta prokurore heton përmbytjet. Flet për “mos përmbushje detyre”, për “pakujdesi”, për “shkatërrim prone”. Por nuk prek thelbin. Nuk prek vendimin politik për të shkatërruar kanalet. Nuk prek interesat që fshihen pas Porto Romanos. Nuk prek emrat që kanë përfituar nga kjo katastrofë. Dhe mediat e blera, heshtin po njësoj.
Kryeministri flet për fatkeqësi natyrore. Por as katastrofa kriminale e mbetjeve toksike, as shkatërrimi i kanaleve, as hidrovori i dështuar nuk janë nga natyra. Janë nga pushteti. Janë nga një sistem që mbron të fortët dhe fundos qytetarët.
Skandalet janë të ndryshme. Personazhet janë të njëjtë. Dhe për sa kohë prokuroria dhe media do të sillen si mburojë për ta, vendi do të vazhdojë të përmbytet, jo vetëm nga uji, por nga padrejtësia.
