Që prej ditës së hënë, ka nisur mbajtja e historikut të aksidenteve që tashmë do të përcaktojë dhe pagensën e sigurimit që paguhet për automjetin.
Drejtuesit e automjeteve që përgjatë një viti kalendarik nuk përfshihen në asnjë aksident do të përfitojnë 5% ulje për tarifat e sigurimit të detyrueshëm të automjeteve, ndërsa ata që përfshihen në aksidente, do të paguajnë policën 15% më shumë. Kjo është skema që do të ndiqet për sigurimin e detyrueshëm të automjeteve me hyrjen në fuqi të sistemit “bonus malus”.
Siç është shprehur drejtori i Mbikëqyrjes së Tregjeve në AMF, Endri Kote, historiku i aksidenteve ka bazë vjetore dhe çmimet e siguracioneve do të vendosen me bazë të kësaj metodologjie nga prilli i vitit 2020.
“Mbas një viti, me shkaktimin e një aksidenti do të ketë një rritje me 15% të çmimit të policës dhe një ulje me 5% për ata drejtues që nuk kanë shkaktuar asnjë aksident.”- u shpreh Kote.
“Në bazë të kësaj formule, për një automjet me një motor prej 1600 kubikë, çmimi bazë i sigurimit është afro 18 mijë lekë në vit, nëse kryhen një aksident çmimi rritet në 20,700 lekë. Kur je disa herë shkaktar, çmimi mund të dyfishohet duke shkuar deri në 36 mijë lekë. Gjithsej janë 19 klasa ku listohen përdoruesit e autoveturave dhe mikorbusëve. Secili e nis nga klasa e trembëdhjetë, ku është përcaktuar tarifa bazë. Ndërkohë nëse nuk je shkaktar aksidenti, mund të përfitosh deri në përgjysmim të tarifës. Përveç efektit ekonomik, AMF synon që të ulë numrin e aksidente dhe pasojave prej tyre me aplikimin e sistemit ‘bonus malus’.”-është shprehur më tej ai.
Burimi: Balkanweb
