Ministrja e Shëndetësisë, Ogerta Manastirliu, ka publikuar në rrjetet sociale rastin e Besmirës, një 29-vjeçare nga Kukësi që ia doli të sjellë në jetë me shëndet të plotë foshnjën e saj pas një beteje të vështirë me COVID-19. Besmira kaloi një ndërhyrje delikate për të sjellë në jetë fëmijën e saj dhe tashmë ndodhet në shtëpi, në gjendje të mirë shëndetësore dhe jashtë rrezikut për jetën. Ogerta Manastirliu vlerësoi punën e shkëlqyer të stafit të spitalit “Shefqet Ndroqi” dhe “Koço Gliozheni”, që sipas saj, bënë të mundur që Besmira dhe vajza e saj e porsalindur, të kthehen shëndosh e mirë në shtëpinë e tyre në qytetin verilindor.
POSTIMI I PLOTË:
“Besmira dhe foshnja e saj e fituan betejën e jetës, në përballjen e vështirë me covid19, falë profesionalizmit dhe përkushtimit të bluzave të bardha.
Pas ndërhyrjes tejet delikate për të sjellë në jetë vajzën, 29-vjeçarja nga Kukësi, me komplikacione të rënda si pasojë e covid19, ia doli mbanë.
Punë e shkëlqyer e ekipit të spitalit “Shefqet Ndroqi” dhe “Koço Gliozheni”, të cilët bënë të mundur që Besmira dhe vajza e porsalindur, pas dy javësh të vështira në terapi intensive, të kthehen shëndosh e mirë në shtëpi. Krenare për mjekët dhe infermierët”.
