Ndahet nga jeta mjekja anesteziste në QSUT, Nertila Kodra Gora

Dr. Nertila Kodra Gora, mjeke anesteziste reanimatore në Qendrën Spitalore Universitare “Nënë Tereza”, është ndarë nga jeta pas një beteje të gjatë me një sëmundje të rëndë.

Humbja e saj ka lënë një boshllëk të madh jo vetëm për familjen, por edhe për kolegët dhe gjithë komunitetin mjekësor shqiptar.

Me një përvojë 27-vjeçare në Shërbimin e Kirurgjisë së Përgjithshme në QSUT, Dr. Nertila shquhej për profesionalizmin, humanizmin dhe përkushtimin e palëkundur ndaj pacientëve.

Në një mesazh të ndarë nga Shoqata e Anestezistëve dhe Reanimatorëve të Shqipërisë, kujtohet forca, dinjiteti dhe guximi me të cilat ajo përballoi çdo sfidë të jetës, duke u bërë frymëzim për të gjithë ata që patën fatin të punonin pranë saj.

“Pas një beteje të gjatë dhe të vështirë, Nertila u largua duke lënë pas një boshllëk të pazëvendësueshëm. Do të mbahet mend për dashurinë që përcillte dhe profesionalizmin e rrallë,” thuhet në deklaratën e Shoqatës.

Edhe QSUT ka shprehur ngushëllime të thella në një reagim publik, duke nënvizuar se Dr. Nertila ka qenë një figurë model në sistemin shëndetësor:
“Prej 27 vitesh, ajo shërbeu me ndershmëri, përkushtim dhe dashuri të pakushtëzuar për pacientët. Në këtë moment të dhimbshëm, stafi i QSUT-së u shpreh ngushëllimet më të sinqerta vajzave të saj, bashkëshortit, prindërve, miqve dhe kolegëve.”

🕯️ Pusho në paqe, Dr. Nertila. Kujtimi yt do të jetojë me respekt dhe mirënjohje të përjetshme.