Kreu i Partisë Demokristiane Nard Ndoka, ka konfirmuar mbrëmjen e sotme se do të marrë pjesë nesër në takimin që Berisha do të zhvillojë me demokratët e Shkodrës.
Ndoka tha në Top News se do të jetë krah Sali Berishës në takimin e radhës në Shkodër dhe se sipas tij Berisha është një lider që i ka sjellë fitore PD, gjë që nuk e ka bërë Basha, duke konfirmuar në këtë mënyrë pakënaqësitë që lindën mes tyre që në zgjedhjet e 25 prillit, pasi Ndoka u la jashtë listës së sigurtë në Shkodër.
Ndoka u shpreh më tej se Basha tashmë ndihet i frikësuar nga aksioni i Berishës, pasi e ka humbur autoritetin në PD.
“Basha nuk arriti dot të ishte lidership i opozitës, sepse ka pasur shumë defekte.
Ne ia kemi thënë hapur, i kemi kërkuar që të jetë më i vendosur. Ne i kemi dhënë një lloj autoriteti, dhe kjo është e gabuar dhe falë kësaj nuk arriti të bëhej lider.
Më duket se tani ka më shumë frika nga zoti Berisha. Basha e ka humbur autoritetin e tij në PD,” tha Nard Ndoka.
Kujtojmë se tensionet mes kryedemokratit Basha dhe ish-kryeministrit Sali Berisha kanë nisur që me përjashtimin e këtij të fundit nga grupi i Partisë demokratike pasi u shpall “non grata”.
