Mjeket e spitalit të Fierit kanë dalë sërish në protestë, e dyta brenda pak ditëve. Mjekët deklarojnë se i riu Ardit Klina, i cilësuar sipas tyre me probleme të shëndetit mendor, ka shkuar dje në poliklinikë, duke mos i lejuar të ushtrojnë profesionin e tyre, i ka fyer dhe kërcënuar.
Sipas mjekeve, Klina është futur në spital dhe ka kërkuar shërbim për të atin në shtëpi, shërbim nuk ofrohet nga mjekët e spitalit, por vetëm ata të poliklinikës. Mjekët deklarojnë se nëse nuk merren masa nga Policia për ndalimin e këtij personi, ata do të përshkallëzojnë protestat.
Ardit Klina u arrestua nga policia pak ditë më parë, pasi u dhunua nga mjekët në spitalin e Fierit, teksa u akuzua për dhunë ndaj tyre. Nga ana tjetër, mjekët mohuan që kishin ushtruar dhunë ndaj tij, por në foto dukeshin qartë shenjat.
“Personi që ka qenë problem në spitalin e Fierit, ndodhej në Poliklinikë dhe vjen kap mjekë të ndryshëm, duke u thënë: “Ti do vish të vizitosh babain tim”. Instancat shtetërore nuk kanë marrë asnjë masë për vështirësitë që na janë dashur për përballjen me koronavirusin. Instancat shtetërore të marrin masa sa më shpejt, kjo protestë sot e vogël nesër mund të jetë e madhe dhe kjo mund të bjerë në kurriz të qytetarëve”, deklaroi një mjek.
