Tuneli i ri, por ende pa ventilim
Edhe pse qarkullimi në tunelin e Murrizit u hap më 14 mars, sistemi i ventilimit ende nuk funksionon, duke krijuar shqetësime serioze për drejtuesit e automjeteve. Ky tunel, i fundit që mbeti i papërfunduar në projektin e Rrugës së Arbrit, është tashmë në përdorim nga të gjithë ata që udhëtojnë nga Tirana drejt Dibrës dhe Maqedonisë së Veriut, duke shmangur bypassin e Murrizit.
Rreziku nga gazrat e makinave
Me një gjatësi prej 3.8 kilometrash dhe një numër të konsiderueshëm automjetesh që kalojnë çdo ditë, mungesa e ventilimit në tunel po kthehet në një problem serioz. Gazrat e emetuara nga automjetet po krijojnë një ambient të rrezikshëm për shoferët dhe pasagjerët.
“Po mbytemi nga gazrat. Është e pamundur të qarkullohet në këtë tunel pa ventilatorë,” shprehen shoferët e irrituar, duke kërkuar një ndërhyrje të menjëhershme për aktivizimin e sistemit të pastrimit të ajrit.
Një projekt i gjatë dhe i kushtueshëm
Ndërtimi i Rrugës së Arbrit, që ka një gjatësi totale prej 69 kilometrash dhe përfshin 6 tunele dhe 4 ura, nisi që në vitin 2011. Kostoja e koncesionit për këtë projekt është përllogaritur në 40.3 miliardë lekë.
Pavarësisht investimit të madh, fakti që ventilimi i tunelit ende nuk është vënë në punë, ka ngritur pikëpyetje mbi përfundimin e plotë të punimeve dhe sigurinë e udhëtarëve që përdorin këtë rrugë çdo ditë.
