Në një kohë kur ministri i Turizmit dhe Mjedisit, Blendi Klosi, ka deklaruar se pyjet dhe parqet kombëtare janë “të sigurta”, sëpata dhe sharra po bëjnë namin me të prerë dhe me të rrafshuar pemët.
Dhe ndryshe nga sa deklaron ministri Klosi, pyjet që po priten nuk janë për “dru zjarri” nga banorët e zonave rurale, por prerje masive për lëndë drusore për tregtim.
Këtë fakt e tregon edhe rasti i sotëm, ku policia e Përmetit ka bërë ndalimin e një personi i cili është kapur me trafikimi të lëndës drusore në automjet të pa pajisur me dokumente.
Gjatë kontrollit të rastësishëm të dokumentacionit, shërbimet e Policisë kanë konstatuar se shtetasi H.Sh. i moshës 24-vjeçare, nga Gjirokastra, po drejtonte mjetin pa leje drejtimi dhe në të mbante edhe një sasi të konsiderueshme lënde drusore pa dokumente.
“Shërbimet e Seksionit të Shërbimeve të Trafikut Urban dhe Interurban, në vijim të punës për evidentimin dhe ndëshkimin e drejtuesve të mjeteve që shkelin rregullat e qarkullimit rrugor dhe të atyre që drejtonin mjetin në mënyrë të parregullt, në vendin e quajtur “Kryqëzimi i Ballabanit”, Këlcyrë, kanë ndaluar shtetasin H. Sh., i cili po transportonte me një mjet tip furgon, dru të prera në mënyrë të paligjshme, pa dokumentacionin përkatës”.
Në përfundim të veprimeve u bë arrestimi në flagrancë i shtetasit H. Sh., 24 vjeç, banues në Gjirokastër, për veprat penale “Drejtimi i automjeteve në mënyrë të parregullt” dhe “Prerja e paligjshme e pyjeve” dhe materialet i kaluan Prokurorisë, për veprime të mëtejshme.
/GazetaReforma.com/
