Pas premtimit të dhënë, kryetarja e LSI Monika Kryemadhi nuk ka bërë më asnjë dalje publike lidhur me “inceneratorët”. Më 3 mars, Kryemadhi u zotua se do të çonte në burg shumë zyrtarë e politikanë, por mesa duket e ka harruar këtë çështje njësoj sikurse kreu demokrat, Lulzim Basha, gjashtë muaj më parë.
Bëhet fjalë për aferën e 400 milionë eurove për ndërtimin e tre inceneratorëve në qytetin e Fierit, Tiranës dhe Elbasanit.
Disa nga akuzat e bëra për këto ndërtime ishte vlera shumë herë më e lartë nga tregu, gjithashtu dhe mungesa e standarteve dhe procedura klientaliste.
Fillimisht ka qenë kreu i opozitës ai që inicoi akuzat e rënda kundër qeverisë dhe kyreministrit Edi Rama.
Gati 6 muaj më parë, PD paralajmëroi të dhëna dhe fakte për këtë skandal. Për gati një muaj Basha në daljet publike tha se me provat që zotëronte Partia Demokratike, do të kryqëzoheshin jo vetëm pronarët e incenatorëve por dhe drejtuesit e politikës.
Në momentin kur do të hidhej hapi i fundit, ku të gjitha faktet e provat duheshin çuar në SPAK, ku dosjet apo kallëzimet e rregjistruara të plotësoheshin me faktet dhe provat që kishte PD, gjithçka ra në heshtje.
Pas kësaj harrese, inceneratorët u rikthyen në vëmendje nga LSI. Kësaj rradhe nga kryetarja Monika Kryemadhi.
Të mërkurën që kaloj, Kryemadhi në një deklaratë për mediat denoncoi publikisht skandalin e paralajmëruar për landfillin e Tiranës.
Ajo tha se zotëronte të gjithë dokumentacionin përkatës të detajuar në lidhje me skandalin e ndodhur në këtë landfill. Kryemadhi u shpreh se do ti dërgonte në SPAK për të parë dhe identitetin e vërtetë të këtij instuticioni.
“Ashtu siç kam deklaruar dy ditë më parë, do të paraqes sot të vërtetat tronditëse, të dokumentuara, se si ministra, shtetarë dhe drejtues të tjerë të lartë të shtetit kanë kryer vjedhjen më të madhe të dokumentuar në 100 vite shtet.”, është shprehur Kryemadhi.
Kryetarja e LSI, në një deklaratë në media, shpjegoi sesi institucionet ngurronin për të dhënë “OK” për ndërtimin e incineratorit të Tiranës.
Sipas saj Arben Ahmetaj u shmang, ndërsa këmbëngulja u bë nga ana e Lefter Kokës.
Edhe pse daljet publike kanë qenë të shpeshta, kujtojmë këtu dhe “Opinion” në TV Klan, Kryemadhi vijoi po njësoj me paralajmërime, por pa fakte konkrete.
Pas gati një javë harrese, dyshimet janë a do ti shkohet deri në fund këtij denoncimi, që fillimisht nisi nga PD? Mos ndoshta dhe LSI bën zhurmë para zgjedhjeve e do ta harrojë njësoj sikurse Basha?
