Ashtu siç kanë parashikuar mjekët kjo javë do jetë e paqëndrushme dhe numri i të infektuarve do pësojë luhatje.
Kështu, ditën e sotme u rrit sërish numri i të infektuarve nga COVID-19, pasi u regjistruan 17 raste në reja në 24 orët e fundit, kurse dje u raportuan vetëm 6 raste, teksa fatmirësisht, në dy ditët e fundit nuk ka ndërruar jetë asnjë person.
Nga të prekurit 57 persona janë të shtruar në dy spitalet COVID, nga të cilët 4 persona janë të intubuar në spitalin “Shefqet Ndroqi”, kurse në spitalin COVID 1 nuk ka të intubuar, por 5 pacientë janë në terapi intensive.
Së fundmi, mjeku Tritan Kalo, në një intervistë për “Report Tv” ka rrëfyer se çfarë po ndodh brenda ambienteve të Infektivit, duke shtuar edhe pengjet e pacientëve që qëndrojnë të izoluar.
Sipas mjekut, pacientët e vuajnë shumë mungesën e familjes dhe lirisë, por bluzat e bardha mundohen tu qëndrojnë sa me pranë.
“Ne si personel mjekësor mundohemi që përveç suportit mjekësor të bëjmë edhe një suport psikologjik sepse është e qartë se individi i mbyllur vuan mungesën e këtij mjedisi, por duke qenë e përkohshme, ta mbushim ne këtë kohë qëndrimi në spitale. Në ditën e 12-14 përcaktojmë nëse kemi ose jo vazhdimësinë. Nëse rezultojnë negativë rikthehen në familje dhe i nënshtrohen një kontrolli të dytë. Tani nuk qarkullon vetëm COVID-19, por edhe infeksione të tjera, alergjitë stinore. Këta individë e vuajnë largësinë nga familja por ne mundohemi të krijojmë një mundësi relaksimi,”- tha Kalo ndër të tjera.
Kalo nuk e shikon pozitivisht lehtësimin e masave nga ana e qeverisë, tashmë që prej më shumë se tre javësh Shqipëria është izoluar nga COVID-19, pasi tha se lehtësimi i masave do na kthehet në bumerang dhe se mund të shpërthejë një valë e dytë e virusit.
“E rëndësishme është që masat e marra dhe izolimi i ndërgjegjësuar ka bërë që numri i rasteve të mos pësojë rritje të menjëhershme. Pas disa javëve qeveria do të vijojë lehtësimin e masave, por në këto momente mund të shndërrohet në një bumerang dhe mund të kthehet një valë e dytë,“- u shpreh Kalo ndër të tjera.
Kujtojmë se deri tani janë shëruar 154 pacientë, një shifër goxha e lartë sipas autoriteteve shëndetësore.
