Vrasja e 27-vjeçarit shqiptar në Greqi, i cili u gjet i karbonizuar në një zonë të braktisur, vijon të mbulohet nga misteri. Hetimet e para tregojnë se viktima, Sulo Halili nga Tepelena, ishte pa precedent penal dhe i panjohur për autoritetet, fakt që ka ngritur pikëpyetje mbi motivin e vrasjes.
Gerasimos Kourouklis, drejtues i organizatës “Silver Alert”, ka zbuluar itinerarin e fundit të 27-vjeçarit, që tashmë po hetohet nga policia greke. “Ai u largua nga shtëpia më 4 nëntor, shkoi në Vilia dhe atje telefonoi gruan, duke i thënë se po priste një mik. Më pas telefoni i tij u fik. Të premten një gjuetar pa një makinë të djegur, brenda së cilës u gjet trupi i 27-vjeçarit. Ai kishte plagë me armë zjarri dhe makina ishte djegur për të zhdukur gjurmët,” deklaroi Kourouklis.
Të afërmit e Halilit në Shqipëri janë të tronditur dhe kërkojnë zbardhjen e ngjarjes. Xhaxhai i tij tregoi se nipi ishte njeri i qetë, i përkushtuar ndaj familjes dhe punës. “Nipi im ishte djalë i rregullt, punë, shtëpi, punë. Nuk kishte konflikte me askënd. Ka dy fëmijë të vegjël, foshnja e tij është vetëm një muajshe. Nuk e dimë çfarë ndodhi, jemi të shkatërruar,” tha ai për mediat greke.
Edhe bashkëshortja e të ndjerit dëshmoi se më 4 nëntor ai ishte nisur drejt Vilias në Atikë, pasi kishte planifikuar të takonte një mik. Ajo ka treguar për autoritetet se Halili kishte komunikuar me një grua që kishte njohur së fundmi përmes rrjeteve sociale, ndërsa makina e tij u gjet e parkuar në hyrje të një fushe basketbolli me cigaret dhe një xhaketë brenda.
Gjatë dëshmisë, gruaja e tij tha se tre vite më parë bashkëshorti kishte marrë mesazhe kërcënuese nga ish-partneri i saj, i cili ishte xheloz, por që nuk ishte takuar kurrë me ta. Ajo u ka dorëzuar hetuesve të dy telefonat e saj për të ndihmuar në hetim.
Sipas “Newsbomb.gr”, një tjetër pistë hetimore lidhet me faktin se 27-vjeçari kishte të njëjtin emër me një personazh të njohur të botës së krimit në Greqi, i përfshirë në disa vrasje, çka ngre dyshime se mund të jetë vrarë gabimisht. Megjithatë, avokati i familjes, Alexandros Papaioannidis, ka hedhur poshtë këtë mundësi, duke theksuar se ende nuk ka prova që konfirmojnë një ngatërrim identitetesh.
Autoritetet greke po analizojnë pamjet e kamerave të sigurisë dhe dëshmitë e marra për të zbuluar autorët e ngjarjes. Deri më tani, policia përjashton përfshirjen e Halilit në rrjete kriminale apo trafik armësh e drogash, ndërsa hetimet po përqendrohen në zonën e Vilias, ku u gjet automjeti i tij i djegur.
Familja e 27-vjeçarit kërkon drejtësi dhe bën thirrje që autoritetet të zbardhin sa më shpejt këtë krim të rëndë që i mori jetën një të riu dhe shkatërroi një familje të tërë.
