Komitetit Teknik i Ekspertëve zhvilloi ditën e sotme një mbledhje me fokus masat paraprake për parandalimin dhe përhapjen e Coronavirsuit.
Bëhet me dije se Ministria e Shëndetësisë dhe Mbrojtjes Sociale ka rialokuar një fond shtesë prej 1 milion dollarësh në buxhetin e spitaleve, që do përdoret për rritjen e stokut aktual të mjeteve të mbrojtjes personale.
Po ashtu, ministria ka siguruar personelin shëndetësor dhe qytetarët se aktualisht, të gjitha strukturat spitalore kanë në dispozicion sasinë e nevojshme të mjeteve të mbrojtjes personale për të përballuar situatën, teksa rithekson nuk ka raste të konfirmuara me COVID 19 në vendin tonë.
Ndërkohë, për të gjithë qytetarët që kanë udhëtuar nga vendet e prekura,por jo vetëm, prej ditësh ministria ka vënë në dispozicion numrin e telefonit 127, ku mund të telefonohet në rast të shfaqjes së çdo shqetësimi apo shenje klinike.
Pasditen e sotme, numri i viktimave në Itali shkoi në 10, teksa raportohet për 322 të prekur.
Në rang botëror, deri më tani Coronavirusi ka vrarë të paktën 2700 persona, ndërsa janë prekur më shumë se 80 mijë të tjerë, teksa situata më e rënduar vijon të jetë në Kinë.
Ditën e djeshme, OBSH bëri thirrje për reagim global pasi jemi në kushtet e një pandemie.
