Minatori dhe sindikalisti Elton Debreshi ka arritur të mbledhë firmat e nevojshme për kandidimin si deputet i pavarur në qarkun e Dibrës. Lajmin e ka dhënë nëpërmjet një postimi në Facebook Sindikata e Minatorëve të Bashkuar të Bulqizës. Në postim njoftohet se numri i nevojshëm i i firmave është tejkaluar. Nga1300 firma që janë të nevojshme për qarkun e Dibrës, janë mbledhur thuajse 1500. Elton Debreshi është prej 10 vitesh minator dhe në vitin 2019 u zgjodh unanaimisht kryetar i Sindikatës së Minatorëve të Bashkuar të Bulqizës, arsye për të cilën u pushua nga puna prej kompanisë Albchrome të Samir Manes.
Njoftimi i SMBB:
KEMI PËRFUNDUAR MBLEDHJEN E FIRMAVE PËR KANDIDIMIN E ELTON DEBRESHIT
Të nderuar minatorë, qytetarë të Dibrës dhe dashamirës anekënd Shqipërisë!
Ju njoftojmë se pas katër javësh pune intensive është tejkaluar numri i nevojshëm i firmave për të zyrtarizuar kandidimin e pavarur të Elton Debreshit në zgjedhjet e 25 prillit.
Gjatë këtyre javëve jemi takuar me mijëra bashkëqytetarë, besimi dhe mbështetja e të cilëve na ka mbushur me shpresë. Ata nuk na kanë dhënë vetëm një firmë, por janë zotuar që së bashku ta çojmë deri në fund përpjekjen për miratimin e Statusit të Minatorit dhe vendosjen e Dibrës në qendër të vëmendjes shtetërore.
Kandidimi i një minatori të palodhur, sindikalisti të guximshëm dhe njeriu të ndershëm është risi jo vetëm për qarkun tonë, por për mbarë vendin. Zgjedhja e Elton Debreshit do të jetë një ditë historike, e cila do të tregojë se kur punëtorët dhe njerëzit e thjeshtë bashkohen asgjë nuk është e pamundur.
Në fund, nuk mund të mos falënderojmë të gjithë minatorët dhe qytetarët, si dhe aktivistët e Organizatës Politike, të cilët janë angazhuar së bashku në takime të panumërta për të mbledhur firmat e kandidimit.
#MeEltonDebreshin
