Kreu i Inspektoratit të Lartë të Drejtësisë, Artur Metani në fjalën e tij në parlament, ka bërë një analizë të punës së institucionit që drejton gjatë vitit 2020. Metani ka theksuar se ILD ka bërë një punë voluminoze gjatë vitit që lamë pas duke shtuar se mbi 3 mijë dosje janë paraqitur gjatë vitit. Ai ka thënë se përmbushja e objektivave do kohë, gjithashtu ai ka theksuar se pasja e një sistemi gjyqësor më të fortë do të sjellë edhe një sistem demokratik më të drejtë.
“ILD shqyrton dhe heton çdo gjyqtar, që kryen shkelje. ILD vihet në lëvizje, kur ka një denoncim ndaj një gjyqtari a njeriu të drejtësisë. ILD pati vështirësi ndaj Covid. KLGJ ka pranuar kërkesën për shkarkimin e një magjistrati. Janë mbi 700 qytetarë që kanë bërë kallëzime në KLD. Ankesat e qytetarëve bëhet edhe online, por edhe me postë. Puna jonë do vazhdojë me synime të qarta. ILD ka pasur gjithmonë parash pavarësinë e gjyqtarëve dhe të prokurorëve, duke mbajtur larg ndërhyrjet politike. Përmbushja e objektivave do kohë. Pasja e një sistemi gjyqësor të fortë do të sjellë edhe një sistem demokratik më të drejtë”, tha Metani.
Artur Metani vlerësoi faktin që qytetarët kanë bërë shumë ankesa dhe gjithashtu ai ka theksuar se qytetarët shpesh herë ankohen për çështje që kanë të bëjnë drejtpërdrejte me sistemin gjyqësor dhe se nuk janë në kompetencë të ILD-së.
“Unë hetoj shkelje të natyrës disiplinore të gjyqtarëve dhe nuk hyj në çështje të brendshme të drejtësisë. Ne trajtojmë ankesat e trashëguara, që nuk ishin trajtuar më parë dhe ky numër është shumë i madh dhe ndërkaq janë edhe ankesat që vijnë.
Ne po trajtojmë edhe ankesat e vjetra, që të mos shkelim barazinë e ankesave. Numri i denoncimeve nga qytetarët është më i madh sesa i institucioneve. Qytetarët shpesh kërkojnë që të zgjidhet një çështje ku ata janë në gjyq, por nuk është kompetencë e jona, por e pushtetit gjyqësor”, u shpreh Metani.
